Унікальныя рэчы Чэслава Немана знайшлі ў Шчучынскім раёне



Гісторыкі-валанцёры прыехалі расчышчаць гарышча радавога дома знакамітага ўраджэнца Беларусі. Гэта ўжо другая «экспедыцыя» у раней не даследаваную частку дома, цяпер – сельскага клуба-музея артыста.

Чэслаў Неман з „Песнярамі” ў 1971 годзе. Фота: архіў музея

Літаральна кожны квадратны сантыметр гарышча актывісты грамадскага аб’яднання «Гiсторыка» скрупулёзна расчышчалі ў масках і пальчатках. 

Так выглядала начынне гарышча. Фота: Вера Савіна.

Упершыню прыхільнікі артыста зазірнулі ў маленькае паддашкавае акенца ў лютым. Тады група менскіх аматараў творчасці Немана паехала на традыцыйную сустрэчу ў Старых Васілішках і вырашыла ацаніць стан даху – усё ж такі дому ўжо пад сто гадоў. І літаральна адразу з-пад пласта пылу і старых рэчаў дасталі сшытак па рускай мове шасцікласніка Васілішкаўскай школы Чэсіка Выдрыцкага, а таксама ноты, малюнкі, фатаграфіі і негатывы.

Чэслаў Неман з баянам у руках у Старых Васілішках. Фота: архіў музея.

На гарышчы знайшлі таксама некалькі малюнкаў. Знаўцы яго мастацкай творчасці кажуць, што па стылі і каларыстыцы іх, хутчэй за ўсё, намаляваў сам Неман. Там жа была і даведка з сельсавета аб тым, што Чэслаў сапраўды пражываў у вёсцы Старыя Васілішкі, і не адпраўлены ім ліст або яго чарнавік. Апошні адносіцца да кастрычніка 1957 году – за год да яго рэпатрыяцыі ў Польшчу.

Ліст Чэслава Выдрыцкага загадкавай Тамары. Фота: Вера Савіна.

Але пакуль для шырокай публікі гэтыя знаходкі недаступныя: перш чым папоўніць калекцыю музея, іх чакае старанная атрыбуцыя.

Чэслаў Неман ў Старых Васілішках. Фота: архіў музея.

Чэслаў Неман – уладальнік тытула лепшага польскага музыканта ХХ стагоддзя. Ён нарадзіўся ў вёсцы Старыя Васілішкі Шчучынскага раёна, выехаў у Польшчу па рэпатрыяцыі ў 1958-м. Першае прызнанне Неману прынесла ягоная песня «Ці памятаеш ты мяне?” ў выкананні Марлен Дзітрых. Праславіўся артыст з песняй «Дзіўны гэты свет” – гімнам пакалення 1960-х. Доўгія гады ён займаўся эксперыментальнай музыкай.

kp.by