Вальжына Морт прэзентавала зборнік „Эпідэмія ружаў”



Беларуская паэтка, якая доўгі час жыве і працуе ў ЗША, наведала Менск, каб прэзентаваць новы зборнік вершаў. Выданне над назваю „Эпідэмія ружаў” складаецца з выбаркі з дзвюх папярэдніх амерыканскіх кніжак і свежых вершаў. Прэзентацыя прайшла 22 траўня ў кнігарні „Логвінаў”.

Пачаткам імпрэзы стаў спектакль „Мова Х” эксперыментальнага тэатра „Галава-нага” паводле верша Вальжыны Морт «Беларуская мова».

„Гэтая кніжка для мяне вельмі важная. Я асабліва не змянілася за гэты час. І ўсё больш і больш працую над формай”, – кажа Вальжына Морт.

– Я – паэт, і ў мяне няма нічога іншага, акрамя мовы і паэзіі. Таму беларуская мова – маё ўсё. Паэтычны радок – гэта Бог формы. Мне падаецца, што нам вельмі важна надаваць форму хаосу ў нашай галаве, у нашым сэрцы. Паэзія для мяне гэта робіць. Я вельмі кніжны чалавек, і мне вельмі падабаецца мая кніжка. Гэта прыемна, вельмі кранае, у пэўным сэнсе нават пужае.   

Рэдактарам кнігі і мадэратарм сустрэчы ў Менску выступіў пісьменнік Альгерд Бахарэвіч.

– Я параўнаў кніжку Вальжыны з садам, дзе растуць разам і роспач, і любоў, нейкія таямніцы. І Вальжыне гэтае параўнанне вельмі спадабалася, калі яна прачытала яго. Яна таксама хацела б, каб да яе творчасці ставіліся як да саду, каб да гэтай кніжкі ставіліся як да нейкага таямнічага саду, у якім можа быць небяспечна і страшна, але ў той жа час цікава. Важнасць Вальжынінай кніжкі ў тым, што яна сапраўды пашырае межы гэтага свету. Дзякуючы таму, што яна і жыве далёка ад Беларусі, яна застаецца і беларускай паэткай, але ў той жа час яна робіць Беларуссю ўвесь свет.

Бліжэйшым часам у публікі будзе магчымасць наведаць яшчэ некалькі сустрэчаў з аўтаркай. 2 чэрвеня яна возьме ўдзел у Літаратурным клубе Альгерда Бахарэвіча. А 3 чэрвеня ў музеі Петруся Броўкі ў Менску пройдзе супольная вечарына паэтычных чытанняў Юлі Цімафеевай і Вальжыны Морт.

Алена Вільтоўская, Беларускае Радыё Рацыя, Менск

Фота аўтаркі