Віцебскі Vargentorn запрашае прайсці “Шляхамі гісторыі”



30 чэрвеня  клуб гістарычнай рэканструкцыі Vargentorn  запрашае на анлайн-сустрэчу, дзе  будзе прэзентаваны новы праект  „Шляхамі гісторыі”.  

Фота: Дзмітрый Лось.

Ён рэалізуецца ў межах кампаніі «Зробім лепш-2020» пры падтрымцы «Асамблеі НДА» . І яго вынікі – паштоўкі з выявамі гістарычных касцюмаў і апісанне гэтых касцюмаў ды бытавых сцэн – зацікавяць не толькі аматараў гісторыі, лічыць каардынатарка праекта Станіслава Цярэнцьева:

– Зараз мы падумалі, што можна не толькі зрабіць гэтыя паштоўкі, якія прэзентуюць наш клуб, наш горад. Мы робім асобна ўсе матэрыялы з апісаннем, што гэта за строй, якія там асаблівасці. І можна будзе гэтыя матэрыялы выкарыстоўваць на занятках у школах, во ўніверсітэце, у розных  цэнтрах культуры і гэтак далей.

Станіслава Цярэнцьева

Фота з асабістага архіва Станіславы Цярэнцьевай.

Удзельнікі клуба гістарычнай рэканструкцыі , якім шмат гадоў кіруе Макар Бабенка, сталі мадэлямі для паштовак. Сфатаграфаваў “гістарычных персанажаў”  Дзмітрый  Лось, дызайнеркай выступіла Анжаліка Гайцюкевіч. Зрэшты, рознага  кшталту візуальную прадукцыю з гістарычнымі строямі клуб Vargentorn прэзентуе ўжо не ўпершыню, і ўсе ахвотныя могуць распытаць аматараў гістарычнай рэканструкцыі пра ранейшыя праекты і іх асаблівасці. А таксама пра далейшыя  перспектывы дзейнасці клуба. Прэзентацыя праекта  „Шляхамі гісторыі” пройдзе  на пляцоўцы Zoom — праз небяспечную эпідэміялагічную абстаноўку, калі непажадана збіраць аматараў гісторыі на сустрэчы ў рэале.

Беларускае Радыё Рацыя, Віцебск