Эстонія дашле на мяжу Польшчы і Беларусі 100 вайскоўцаў



Мінабароны Эстоніі накіруе 100 вайскоўцаў на мяжу Польшчы і Беларусі для ўрэгулявання міграцыйнага крызісу. Пра гэта заявіў кіраўнік ведамства Калле Лаанет, перадае ERR.

Паводле яго слоў, Польшча папрасіла эстонскія ўлады аказаць практычную падтрымку ўвечары 15 лістапада.

«Раней яны хацелі толькі палітычнай падтрымкі, але цяпер ім патрэбна практычная дапамога. Наколькі мне вядома, да гэтага часу практычную дапамогу Польшчы аказвала толькі Вялікабрытанія», — адзначыў Лаанет, выступаючы на прэс-канферэнцыі.

На мяжу Польшчы і Беларусі адправіцца ўзвод сапёраў і падраздзяленне ваеннай паліцыі. Акрамя таго, Эстонія накіруе Польшчы дроны. Частка вайскоўцаў адправіцца ў Польшчу неадкладна, частка адправіцца на наступным тыдні.