Праваабаронцы звярнуліся ў пракуратуру, КДБ і МУС з нагоды знікнення Юліі Чарняўскай



Праваабарончыя арганізацыі Беларусі выступілі з заявай і заклікалі ўлады паведаміць сваякам і грамадскасці, дзе цяпер знаходзіцца Юлія Чарняўская, і пусціць да яе адваката.

У заяве гаворыцца: „Да цяперашняга часу тэлефонны нумар Юліі Чарняўскай не адказвае, яна не знаходзіцца па месцы жыхарства. Няма афіцыйнай інфармацыі ад прадстаўнікоў праваахоўных органаў пра месцазнаходжанне і працэсуальны статус Юліі Чарняўскай”.

Праваабарончыя арганізацыі прапануюць:

– неадкладна праінфармаваць блізкіх сваякоў (дачку і маці) пра месцазнаходжанне ва ўстановах (у тым ліку медыцынскіх) сістэмы МУС ці КДБ, стан здароўя і працэсуальны статус Чарняўскай Юліі Вісарыёнаўны;

– пры знаходжанні Юліі Чарняўскай ва ўстановах (у тым ліку медыцынскіх) сістэмы МУС ці КДБ – неадкладна забяспечыць доступ да прававой дапамогі і дапусціць адваката;

– у пазбяганне здагадак – інфармаваць СМІ і грамадскасць афіцыйным прэс-рэлізам.

Заяву накіравалі кіраўнікам Генпракуратуры, КДБ і МУС.

Нагадаем, што сувязь з Юліяй Чарняўскай знікла раніцай 18 траўня, калі пачалася аблава на Tut.by і звязаных з ім людзей. Пазней стала вядома, што Чарняўская была пад канвоем міліцыянтаў у шпіталі, яна перанесла гіпертанічны крыз.

Юлія Чарняўская — удава заснавальніка Tut.by Юрыя Зісера, які памёр летась 17 траўня. 

Беларускае Радыё Рацыя

Фота: Уладзімір Чурносаў