Прэзідэнт Польшчы сустрэўся з Канстанцінопальскім патрыярхам Варфаламеем І
Сёння прэзідэнт Анджэй Дуда і яго жонка Агата Корнхаўзер-Дуда сустрэліся з Канстанцінопальскім патрыярхам Варфаламеем I.
Падчас сустрэчы прэзідэнт Польшчы падзякаваў патрыярху за запрашэнне ў месца, якое з’яўляецца „вечнай сталіцай Царквы і хрысціянства, вечнай сталіцай Усходняй Царквы ў шырокім сэнсе гэтага слова”.
– Мы з жонкай з’яўляемся вернікамі Каталіцкай Царквы, але візіт да нашых братоў – гэта для нас вялікі досвед, як духоўны, так і сяброўскі, – сказаў Анджэй Дуда.
Ён звярнуў увагу на тое, што для яго, як для Прэзідэнта Польшчы, гэта таксама важны момант, звязаны з данінай павагі да кіраўніка Усходняй Царквы і ўсіх яго суайчыннікаў, верных Праваслаўнай Царквы ў Польшчы.
„Гэта таксама асаблівы час, калі разам з суайчыннікамі, палякамі, але і нашымі суграмадзянамі беларускага паходжання мы молімся за мір, молімся, каб вернікі хрысціянскай царквы жылі мірна ў Беларусі, – сказаў Дуда.
Мы спадзяемся, што вернікі ў Беларусі змогуць спакойна вызнаваць сваю рэлігію, яны змогуць жыць у адпаведнасці са сваёй верай, у адпаведнасці з прынцыпамі, у якія яны вераць, і змогуць атрымліваць асалоду ад дэмакратыі, добрага жыцця і росквіту”, – дадаў прэзідэнт Польшчы.
Анджэй Дуда падзякаваў патрыярху Варфаламею I за малітвы і духоўную падтрымку падчас пандэміі COVID-19. Ён таксама прасіў маліцца за Польшчу і палякаў.
Беларускае Радыё Рацыя
Фота: prezydent.pl