Рух «За Свабоду» асудзіў напад на ўкраінскія караблі ў Керчэнскім праліве



Рух «За Свабоду» патрабуе перагледзіць ваенныя адносіны з РФ пасля нападу расейскіх ваенна-марскіх сілаў на ўкраінскія караблі ў Керчэнскім праліве.

«Насуперак Статуту ААН і Канвенцыі ААН па марскім праве яе караблі парушылі свабоду навігацыі ў Керчанскім праліве і ўжылі сілу ў дачыненні да караблёў Украіны, што прывяло да праліцця крыві. Гэтымі дзеяннямі Расейская Федэрацыя зноў прадэманстравала сваю агрэсіўную сутнасць», — адзначылі ў арганізацыі.

Рух «За Свабоду» рашуча асуджае гэтыя неправамерныя дзеянні Масквы, якія, на думку арганізацыі, «сведчаць пра існаванне рэальнай пагрозы незалежнасці і тэрытарыяльнай цэласнасці ўсіх суседзяў Расеі, у тым ліку і нашай дзяржавы».

«Мы патрабуем ад беларускіх ўладаў кардынальна перагледзець усе адносіны з РФ у вайсковай галіне і забяспечыць выкананне канстытуцыйнага палажэння аб нейтралітэце Рэспублікі Беларусь», — адзначылі аўтары заявы.