Тры краіны ЕЗ прапанавалі «план выратавання Украіны» з 10 пунктаў



Прэм’ер-міністар Польшчы Матэвуш Маравецкі расказаў пра план з 10 дзеянняў, якія, на думку польскіх уладаў, павінна выканаць Еўропа для выратавання Украіны ад расейскай агрэсіі.

План апублікавала выданне Politico. Як сцвярджае Маравецкі – гэта сумесны зварот Польшчы, Чэхіі і Славеніі.

Вось гэтыя пункты:

  • Адключэнне ад сістэмы SWIFT усіх расейскіх банкаў
  • Палітыка надання прытулку расейскім салдатам, якія адмовіліся ваяваць ва Украіне
  • Поўнае спыненне расейскай прапаганды ў Еўропе
  • Блакаванне расейскіх караблёў у еўрапейскіх партах
  • Закрыццё аўтамабільнага перамяшчэння з Расеі і ў Расею
  • Увядзенне санкцый у дачыненні да бізнэс-атачэння расейскіх алігархаў
  • Прыпыненне выдачы еўрапейскіх віз для ўсіх расейскіх грамадзянаў
  • Увядзенне санкцый супраць усіх чальцоў «Адзінай Расеі»
  • Забарона на экспарт у Расею любых тэхналогій, якія могуць быць скарыстаныя ў ваенных мэтах
  • Выключэнне Расеі з усіх міжнародных арганізацый.

Раней Польшча прапаноўвала таксама накіраваць ва Украіну міжнародную ваенную міратворчую місію, аднак на нядаўнім саміце NATO гэтая ідэя не абмяркоўвалася. У лютым-сакавіку 2022 году супраць Расеі ўжо ўведзеныя беспрэцэдэнтныя міжнародныя санкцыі.

svaboda.org