У Расеі затрымалі каля 200 удзельнікаў антываенных акцый



У больш чым 10 гарадах Расеі затрымалі каля 200 удзельнікаў акцый супраць вайны з Украінай. Дзясяткі людзей затрымалі ў Маскве і Пецярбургу. У Маскве масавыя затрыманні прайшлі ў парку Зараддзе, размешчаным побач з Крамлём.

Скрыншот unian.net

Апазіцыйны рух «Вясна» раней анансаваў акцыю пратэсту на мосце над ракой Масквой. Расейскія ўлады не ўзгадняюць акцыі пратэсту, паліцыя затрымлівае людзей на падыходзе да месцаў, дзе збіраюцца праціўнікі вайны, часам у аўтазакі трапляюць і выпадковыя мінакі.

Акцыі прайшлі і ў іншых гарадах Расеі, напрыклад, у Казані. З пачатку расейскага ўварвання ва Украіну 24 лютага на антываенных акцыях у Расеі былі затрыманыя больш за 15 тысяч чалавек. Такую лічбу называе незалежны праваабарончы медыя-праект «ОВД-Инфо».

Апошнія тыдні акцыі больш малалікія, чым у першыя дні пасля пачатку вайны.

Беларускае Радыё Рацыя