ЗША і Ізраіль аб’явілі пра выхад з ЮНЕСКА
Дзярждэпартамент ЗША накіраваў афіцыйнае апавяшчэнне аб выхадзе з ЮНЕСКА. Галоўнай прычынай адмовы ад сяброўства называецца антыізраільская пазіцыя арганізацыі. Ізраіль крыху пазней абвясціў аб аналагічным намеры.
Сяброўства ЗША ў ЮНЕСКА спыніцца 31 снежня 2018 года.
Пра рашэнне Ізраіля аб’явіў прэм’ер-міністр Ізраіля Біньямін Нітаньяху. «Прэм’ер-міністр праінструктаваў міністэрства замежных спраў у справе падрыхтоўкі выхаду з арганізацыі разам з ЗША», — гаворыцца ў заяве адміністрацыі Нітаньяху.
Нітаньяху «вітае рашэнне прэзідэнта Трампа аб выхадзе з ЮНЕСКА. Гэта адважнае і маральнае рашэнне, бо ЮНЕСКА ператварылася ў тэатр абсурду, і замест захавання гісторыі, арганізацыя яе перакручвае», адзначаецца ў паведамленні.
У заяве Дзярждэпартамента гаворыцца: «Гэта было нялёгкае рашэнне, яно адлюстроўвае занепакоенасць ЗША ў сувязі з запазычанасцямі ў ЮНЕСКА, неабходнасцю фундаментальнай рэформы арганізацыі і прадузятай антыізраільскай пазіцыяй, якая не спыняецца ў ЮНЕСКА”.
У ведамстве дадалі, што ЗША маюць намер працягваць узаемадзеянне з ЮНЕСКА ў якасці дзяржавы-назіральніка.
Кіраўніцтва ЮНЕСКА выказала шкадаванне ў сувязі з выхадам Злучаных Штатаў.
„Я хачу выказаць глыбокае шкадаванне ў сувязі з рашэннем ЗША выйсці са складу ЮНЕСКА”, — гаворыцца ў заяве кіраўніка арганізацыі Ірыны Бокавай.
ЮНЕСКА – Арганізацыя аб’яднаных нацый па пытаннях адукацыі навукі і культуры – дзейнічае з 1945 года.
У 2011 годзе ў склад ЮНЕСКА ў якасці паўнапраўнага члена была прынятая Палестынская аўтаномія.
ЗША, а таксама Ізраіль, асудзілі гэтае рашэнне. ЗША тады ж прыпынілі выплату членскіх узносаў арганізацыі.
Разыходжанні з Ізраілем
7 ліпеня ЮНЕСКА ўнесла ў спіс Сусветнай спадчыны Стары горад Хэўрона і Пячору Патрыярхаў, якія знаходзяцца на акупаваных Ізраілем палестынскіх тэрыторыях. Арганізацыя таксама пазначыла, што абодва аб’екты знаходзяцца пад пагрозай.
Гэтае рашэнне таксама выклікала негатыўную рэакцыю Ізраіля і ЗША. Яны настойвалі, што ў рэзалюцыі гаварылася толькі пра сувязь Хэўрона з „ісламскай гісторыяй” і не згадвалася пра важнасць горада для габрэйскай культуры.
Акрамя таго, у ЗША заявілі, што Пячора Патрыярхаў не знаходзіцца „пад непасрэднай пагрозай” і ўключэнне яе ў спіс ставіць пад пытанне сур’ёзнасць падыходу арганізацыі.
Прэзідэнт ЗША Дональд Трамп раней крытыкаваў непрапарцыйны, на яго думку, уклад ЗША ў арганізацыі ААН.
На ЗША прыходзіцца 22% бюджэту ААН і 28% бюджэту міратворчых місій.
