Беларуская лучніца сышла са зборнай і з’ехала за мяжу



21-гадовая беларуская лучніца Карына Казлоўская сышла са зборнай і з’ехала за мяжу. Неаднаразовая чэмпіёнка Беларусі, якая заняла на Алімпіядзе ў Токіа з камандай 4-е месца, у Instagram патлумачыла матывы свайго ўчынку. 

„Пачынаючы з 2020 года знаходзілася ў пастаянным стрэсе, — піша Казлоўская. — З-за Алімпійскіх гульняў, пандэміі, выбараў, і пасля палітычных рэпрэсій, якія працягваюцца ў краіне да гэтага часу, і вайны ва Украіне. Дзеля спорту маўчала, цярпела прыніжэнне, пагрозы, запалохванні. Пазбаўлялася ўсё большай колькасці правоў… Усё дайшло да кропкі незвароту і было прынята рашэнне з’ехаць з краіны”. 

Спартоўка паведамляе, што яе афіцыйна звольнілі з нацыянальнай зборнай Беларусі. Гэта яна называе „пачаткам новага этапу ў… спартовым жыцці і добрай навіной”.

„Свабодная і ў бяспецы”, — дадае лучніца. Карына Казлоўская падпісвала ліст беларускіх спартоўцаў супраць гвалту сілавікоў і за новыя выбары ў Беларусі.

Мартынаў, Кузняцоў і Дзярабін падпісалі кантракты з менскім „Дынамам”

Хакейнае менскае „Дынама” дасягнула дамоўленасці пра падпісанне новых кантрактаў з трыма беларускімі хакеістамі, паведамілі у прэс-службе сталічнага клуба.

У стан „зуброў” вяртаецца 20-гадовы нападнік Сяргей Кузняцоў. У мінулым сезоне КХЛ форвард правёў за „Дынама” два матчы, а ў студзені перайшоў у жлобінскі „Металург”, з якім стаў чэмпіёнам Беларусі. У плей-оф Кубка Прэзідэнта Кузняцоў набраў 19 ачкоў у 17 матчах, пабіўшы рэкорд выніковасці для гульцоў да 21 года.

Ігар Мартынаў таксама пачынаў мінулы сезон у складзе менчан, за якіх згуляў 5 матчаў і вызначыўся адной закінутай шайбай. Потым 23-гадовы форвард адправіўся ў „Шахцёр”, у форме салігорскага клуба Мартынаў зарабіў 8 (1+7) балаў у 13 сустрэчах.

Усяго ў КХЛ на рахунку нападніка 13 ачкоў у 92 гульнях. Таксама ростар сталічнай каманды папоўніў абаронца Дзмітрый Дзярабін. У мінулым сезоне 22-гадовы хакеіст згуляў у 27 матчах рэгулярнага чэмпіянату, дзе набраў 4 (1+3) балы. Усяго за кар’еру ў КХЛ Дзярабін разжыўся 9 баламі ў 93 паядынках.

Сталі вядомы пары 1/16 фіналу Кубка Беларусі па футболе

У Доме футбола адбылося лёсаванне матчаў 1/16 фіналу Кубка Беларусі. На гэтай стадыі згуляюць 32 клубы. У розыгрыш уступаюць 16 каманд Вышэйшай лігі, якія далучацца да 16 калектываў, якія выйшлі з папярэдняга раунда турніру.

Пары 1/16 фіналу выглядаюць наступным чынам:

„Лакаматыў” (Гомель) (Д2) – „Дынама-Берасце”;

„Асіповічы” (Д2) – „Нёман” (Гародня);

„Смаргонь” (Д2) – „Слуцк”;

„Ліда” (Д2) – „Арсенал” (Дзяржынск);

„Баранавічы” (Д2) – „Энергетык-БДУ” (Менск);

„Хваля” (Пінск) (Д2) – „Дынама-Менск”;

„Газавік” (Віцебск) (Д3) – „Дняпро” (Магілёў);

„Астравец” (Д2) – „Шахцёр” (Салігорск);

„Крумкачы” (Менск) (Д3) – „Іслач” (Менскі р-н);

„Стэнлес” (Пінск) (Д3) – БАТЭ (Барысаў);

„Нафтан” (Наваполацк) (Д2) – „Менск”;

„Макслайн” (Рагачоў) (Д2) – „Віцебск”;

„Орша” (Д2) – „Гомель”;

„Тэхнолаг-БДУТ” (Магілёў) (КФК) – „Белшына” (Бабруйск);

„Жодзіна-Паўднёвае” (Д3) – „Тарпеда-БелАЗ” (Жодзіна);

„Маладзечна-2018” (Д2) – „Славія” (Мазыр).

Пераможцы пар вызначацца ў аднаматчавых супрацьстаяннях, якія пройдуць 22-23 чэрвеня. Лёсаванне 1/8 фіналу адбудзецца ў Доме футбола 24 чэрвеня.

Дзеючым уладальнікам Кубка Беларусі з’яўляецца футбольны клуб „Гомель”, які ў фінале мінулага розыгрышу абыграў БАТЭ 2:1.

Іска можа працягнуць кар’еру ў „Роме”

Паўабаронца Іска можа працягнуць кар’еру ў „Роме”, паведамляе Sportitalia.

30-гадовы хаўбек, які пакідае „Рэал” пасля заканчэння кантракта, прапанаваны „Роме” яго агентам Жоржэ Мендэшам. У мінулым сезоне футбаліст забіў 2 галы ў 17 матчах за каманду ва ўсіх турнірах.

Іска перайшоў у „Рэал” з „Малагі” у 2013 годзе. У складзе каманды ён стаў пяціразовым пераможцам Лігі чэмпіёнаў, трохразовым чэмпіёнам Іспаніі і ўладальнікам Суперкубка УЕФА, – перадае sport-express.ru.

Беларускае Радыё Рацыя

[manual_related_posts]