Беларускія біятланісты занялі шостае месца ў змешанай эстафеце на Алімпіядзе

5 месяцаў таму

Выдрукаваць Пракаментаваць (0) Падзяліцца

Беларускія біятланісты Дынара Алімбекава, Ганна Сола, Мікіта Лабастаў і Антон Смольскі занялі 6-е месца ў змешанай эстафеце на Алімпійскіх гульнях. Золата ў каманды Нарвегіі, серабро заваявала каманда Францыі, бронзу – расейцы.

Першыя алімпійскія ўзнагароды разыграны ў канькабежным спорце ў Пекіне. Беларуска Марына Зуева ў сёмым з дзесяці забегаў на дыстанцыі 3000 м паказала 4-ы вынік, які даў магчымасць ёй заняць толькі 16-е выніковае месца сярод 20 удзельніц спаборніцтваў. Алімпійскай чэмпіёнкай у гэтым відзе праграмы стала Ірэн Схаўтэн з Нідэрландаў. Уладальнікам срэбра стала італьянка Франчэска Лолабрыджыда, замкнула тройку канадская канькабежка Ізабэль Вайдэман.

Беларускія баскетбалісткі не змогуць згуляць у кваліфікацыі чэмпіянату свету

Баскетбалісткі жаночай зборнай Беларусі не змогуць прыняць удзел у адборавым турніры чэмпіянату свету 2022 года. Беларуская каманда павінна была адправіцца Японію, але гэтага не адбылося – у многіх спартовак і прадстаўнікоў трэнерскага штаба перад самым вылетам быў знойдзены каронавірус. Акрамя таго, у аэрапорце сімптомы захворвання з’явіліся яшчэ ў некалькіх баскетбалістак, што зрабіла немагчымым удзел у кваліфікацыі ЧС з улікам каранцінных абмежаванняў у Японіі.

Ягор Герасімаў выйшаў у другі круг кваліфікацыі турніру ў Ратэрдаме

Ягор Герасімаў (104 АТП) выйшаў у другі круг кваліфікацыі турніру ў Ратэрдаме. У першым раундзе беларус у двух сэтах перайграў прадстаўніка Германіі Даніэля Мазура (177 АТП) — 6:4, 6:4.

Антон Сарока перайшоў у „Акжайык”

Казахстанскі „Акжайык” аб’явіў аб падпісанні 29-гадовага беларускага нападніка Антона Сарокі. Форвард перайшоў ва ўральскі клуб на правах свабоднага агента. У мінулым сезоне Сарока выступаў за „Нёман”, за які правёў 7 матчаў і выніковымі дзеяннямі не вызначыўся.

Беларуская біятланістка Ірына Кручынкіна выйграла спрынт на этапе кубка IBU

Беларуская біятланістка Ірына Кручынкіна выйграла спрынтарскую гонку на этапе кубка IBU, які праходзіць у чэшскім Нове-Месца. Спартоўка прайшла абодва агнявыя рубяжы без промахаў. Беларуска на 13,4 сек. апярэдзіла немку Яніну Хэціх, якая заняла другое месца, і на 17,1 сек. – нарвежку Марту Юхансан, якая стала трэцяй.

Беларускае Радыё Рацыя