Беражкоў: Патрапіўшы на Акрэсціна я адчуваў сябе свабодным чалавекам
Былы генеральны менеджар ХК «Дынама» (Менск) Уладзімір Беражкоў распавядае, што перажыў за восем месяцаў зняволення.
„13 жніўня быў самым, я б сказаў, напружаным днём. Я быў настолькі загружаны працай, гэтая праца была настолькі цяжкая, часам нават непасільная, я настолькі сябе завёў, і перада мной стаяла столькі не вырашаных ў клубе праблем, а рашэнні каштавалі гераічных намаганняў і вельмі высокага напружання з загадзя невядомым вынікам – што я злавіў сябе на думцы, што, калі мяне арыштуюць і я пайду ў турму, то, у прынцыпе, гэта лёгкі выхад з сітуацыі. Гэта значыць, у гэтым таксама ёсць пэўны станоўчы момант для майго здароўя, што мне не давядзецца адказваць за тыя рашэнні, якія будуць давацца з велізарнай працай.
Праца генменеджера адымала столькі здароўя, што, можаш сабе ўявіць, патрапіўшы ў „стакан” ў Партызанскім РУУС, калі мяне ўжо „закрылі”, і далей у ІЧУ на Акрэсціна, я адчуваў сябе свабодным чалавекам. Гэта значыць, мне не трэба было вырашаць кіпу праблем і задач, якія стаялі перад клубам у перыяд падрыхтоўкі да сезону …
… Гэта сапраўды быў пэўны момант цынізму, якім я сам сябе супакойваў. Гэта значыць я знайшоў сабе такую меру заспакаення: раз так, то вось вам у адказ, я рады таму, што мне не трэба цяпер ўсёй лабудой займацца. Гэта быў момант аўтатрэнінгу, які спрацоўваў на ўзроўні падсвядомасці. Але ўсё-ткі, вядома, я не спаў, у галаве стаяў рой падзей, фактаў, Стала аналізаваў, што адбываецца, і г.д.
У журналістыку я ўжо не вярнуся. Журналіста я ў сабе забіў. Не ведаю, ці забіў я ў сабе пісьменніка, таму што я, калі аналізую нават адзін дзень, 13 жніўня (калі затрымалі Беражкова – заўв.), прыходжу да высновы, што можна напісаць раман. Думаю, гэта будзе цікава…», – адзначыў Уладзімір Беражкоў.
Шмат пра што Уладзімір Беражкоў не мае права распавядаць: расследаванне крымінальнай справы ў стасунку да яго працягваецца.
Былы генменеджар ХК «Дынама» прызнаецца, што за апошніх восем месяцаў пераацаніў сваё стаўленне да людзей і да жыцця.
«Прыйшоў да таго, што трэба больш дараваць. Што чалавек слабы. Што чалавек мае патрэбу ў падтрымцы. Што чалавек сам па сабе як істота мае патрэбу ў спагадзе і ў выхаванні, а злосцю яго ня выправіць. Злосць бяссільная ў гэтым плане. Таму я, шчыра кажучы, не ведаю яшчэ, як буду сустракацца і размаўляць з людзьмі, якім бы не паціснуў руку, але я дакладна ведаю, што я ім не буду помсціць, што не буду ажыццяўляць супраць іх ніякіх дзеянняў, якія, скажам так, дрэнна б паўплывалі на іх здароўе, дзелавую і іншую рэпутацыю», – заўважыў Уладзімір Беражкоў.
Цяпер ён знаходзіцца пад падпіскай аб нявыездзе. Паводле старшыні Следчага камітэту Івана Наскевіча, Уладзімір Беражкоў можа быць памілаваны, паколькі пакрыў нанесеную шкоду. Яму прадʼяўленае абвінавачанне ў завалоданні грашовымі сродкамі хакейнага клубу на 1 млрд 90 млн рублёў з выкарыстанне службовых паўнамоцтваў.
Паводле naviny.by, фота „Pressball”
