Названы склад зборнай Беларусі на матчы кваліфікацыі жаночага ЧС па футболе
Галоўны трэнер жаночай зборнай Беларусі па футболе Юрый Малееў назваў склад на чарговыя адборавыя матчы чэмпіянату свету 2023 года.
У трэніровачны лагер выкліканы 22 гульцы. Сярод іх легіянеры брамнік Наталля Васкабовіч з піцерскага «Зеніта», абаронца Лізавета Гіба з маскоўскага «Лакаматыва» і Ганна Казюпа з іспанскага «Эспаньёла», паўабаронца Ганна Сас, якая выступае за нямецкі «Карл Цэйс», Анастасія Шлапакова з іспанскай «Сарагосы», Карына Альховік з італьянскага «К’ева» і Таццяна Краснова з расейскага «Растова». Найбольшае прадстаўніцтва з беларускіх клубаў мае «Менск» – 8 гульцоў. Каманда збярэцца ў Менску 18 чэрвеня, а потым адправіцца у Бялград, дзе 24 чэрвеня правядзе свой пяты паядынак у кваліфікацыйнай групе С супраць каманды Чэхіі.
Ганчарэнка больш не разглядаецца ў якасці кандыдата на пасаду галоўнага трэнера „Нафтчы”
Азербайджанскі футбольны клуб „Нафтчы” вызначаецца з галоўным трэнерам каманды. На дадзены момант кандыдатаў на гэтую пасаду двое. Гэта Юры Вернідуб і Эртугрул Саглам. Такім чынам, у пуле кандыдатаў адсутнічае беларускі спецыяліст Віктар Ганчарэнка, на што зважае azerisport.com. Клуб назаве новага настаўніка каманды ў найбліжэйшыя суткі.
„Чайка” рассталася з Ігарам Стасевічам
Расейская „Чайка” рассталася з хаўбекам Ігарам Стасевічам пасля заканчэння кантракта экс-лепшага гульца Беларусі. Стасевіч правёў за „Чайку” 11 матчаў у ФНЛ-2 (Д3), у якіх забіў адзін мяч. Акрамя таго, на рахунку паўабаронцы адзін матч у Кубку Расеі. Стасевіч, які тройчы прызнаваўся лепшым футбалістам краіны, можа працягнуць кар’еру ў Казахстане. У паслугах футбаліста зацікаўлены два клубы з элітнага першынства гэтай краіны. Адзін з іх – „Мактаарал”.
Марозава і Крысціян прайгралі ў 1/4 фіналу тэніснага турніру ў Берліне
Беларуская тэнісістка Лідзія Марозава і амерыканка Кейтлін Крысціян не змаглі выйсці ў паўфінал парнага разраду турніру катэгорыі WTA-500 у Берліне з прызавым фондам 611 тысяч еўра. У чвэрцьфінале яны ўсяго за гадзіну саступілі ў двух сэтах канадска-мексіканскаму тандэму Габрыэла Даброўскі / Джуліяна Олмас – 4:6, 2:6.
Макрэцкая заваявала бронзу на турніры ў Краснаярску
Беларуская дзюдаістка Яна Макрэцкая заняла трэцяе месца на Усерасійскіх спаборніцтвах памяці В.Н. Гулідава Russian Judo Tour, якія праходзяць у Краснаярску. У паўфінале жаночага турніру ў вагавай катэгорыі да 63 кг Макрэцкая саступіла спартоўцы з Расеі Далі Лілуашвілі, а ў паядынку за бронзу ўпэўнена перамагла яшчэ адну расіянку Аляксандру Саян. Гэта ўзнагарода стала для беларускай каманды другой, раней срэбра ў вазе да 52 кг выйграла Ксенія Даніловіч.
У турніры на прызы Несцярэнкі ў Берасці прымуць удзел 250 лёгкаатлетаў
У адкрытым чэмпіянаце Берасцейскай вобласці на прызы алімпійскай чэмпіёнкі Юліі Несцярэнкі прымуць удзел 250 лёгкаатлетаў. Турнір пройдзе 16-17 чэрвеня, паведаміў БЕЛТА старшы трэнер нацыянальнай каманды па лёгкай атлетыцы па Берасцейскай вобласці Аляксей Ясковіч.
На тэрыторыі вяслярнага канала Берасця пройдуць спаборніцтвы па кіданні молата і дыска. За астатнімі стартамі можна будзе паназіраць у спартовым комплексе „Брэсцкі”.
НХЛ забараніла прывозіць Кубак Стэнлі ў Беларусь і Расею
Нацыянальная хакейная ліга забараніла прывозіць Кубак Стэнлі ў Беларусь і Расею. За ганаровы трафей у фінальнай серыі пазмагаюцца „Каларада” і „Тампа”. За гэтыя клубы выступаюць чацвёра расіян. Традыцыйна кожны гулец каманды-пераможцы атрымлівае Кубак Стэнлі ў сваё карыстанне на некалькі дзён.”Ужо апавясцілі абодва клубы аб тым, што Кубак Стэнлі не паедзе ў Расею ці ў Беларусь сёлета, — кажа намеснік камісара НХЛ Біл Дэйлі. — Магчыма, у будучыні дамо гульцам такую магчымасць”. Кубак Стэнлі ў ліпені 2004-га прывозіў у Беларусь расейскі брамнік „Тампы” Мікалай Хабібулін. Наша краіна — радзіма яго жонкі. Таксама Хабібуліну перадалі, што кубак хацеў пабачыць у Менску Аляксандр Лукашэнка.
Беларускае Радыё Рацыя
