Шведскі абаронца Адам Альмквіст падпісаў кантракт з менскім „Дынама”



Шведскі абаронца Адам Альмквіст падпісаў кантракт з менскім „Дынама”. Пагадненне разлічана на адзін год, паведамляе афіцыйны сайт „зуброў”.

Сезон 2019/20 Альмквіст правёў у КХЛ у складзе „Адмірала”, дзе згуляў за далёкаўсходнюю каманду ў 58 матчах і набраў 26 (8+18) ачкоў.

Вікторыя Азаранка, сёстры Уільямс, Слоан Стывенс – першыя ўдзельніцы турніру ў Лексінгтоне

Названы імёны першых чатырох тэнісістак, якія прымуць удзел у прадстаўнічым турніры ВТА ў Лексінгтоне (ЗША). Гэта амерыканкі Венус і Серэна Уільямс, Слоан Стывенс, а таксама беларуска Вікторыя Азаранка. Спаборніцтвы пройдуць з 10 па 16 жніўня. Зараз Азаранка з’яўляецца 58-й ракеткай свету. У гэтым сезоне Вікторыя правяла толькі адзін афіцыйны матч – на спаборніцтвах у Монтэрэі (Мексіка), дзе саступіла Тамары Зіданшэк з Славеніі ў першым крузе. З-за пандэміі каронавіруса ВТА-тур быў прыпынены ў сакавіку і адновіцца 3 жніўня на турніры ў Палерма.

Беларускі хаўбек Уладзімір Мядзведзь пераходзіць у „Ротар” да Аляксандра Хацкевіча

20-гадовы беларускі паўабаронца Уладзімір Мядзведзь, былы гулец моладзевых каманд „Растова” і „Крылаў Саветаў”, далучыўся на зборы да „Ротара”, які трэніруе беларускі спецыяліст Аляксандр Хацкевіч. У пачатку ліпеня футбаліст падпісаў кантракт з „Чайкай”. Аднак затым Мядзведзю паступіла прапанова з „Ротара”. „Чайка” не стала чыніць перашкодаў хаўбеку і спыніла кантракт па згодзе бакоў па заканчэнні двух тыдняў.

Мазыр і Нароўля прымуць чэмпіянат Беларусі і Алімпійскія дні моладзі па шашэйных велагонках

Мазыр і Нароўля прымуць чэмпіянат Беларусі і Алімпійскія дні моладзі па шашэйных велагонках. Спаборніцтвы стартуюць 23 ліпеня змяшанай каманднай эстафетай нацыянальнага чэмпіянату, а завершацца 26 ліпеня двума групавымі гонкамі ў жанчын і мужчын. Барацьба за ўзнагароды разгорнецца ў трох узроставых катэгорыях: юніёры і юніёркі, моладзь да 23 гадоў і дарослыя спартоўцы.

Ян Каравай, Беларускае Радыё Рацыя

Фота: hockey.by