Вікторыя Азаранка: Я фанатка Ліянэля Месі і „Барселоны”
Вікторыя Азаранка плануе згуляць у складзе зборнай Беларусі ў матчы з расейкамі ў Маскве за выхад у Сусветную групу Кубка Федэрацый. Пра гэта яна паведаміла сёння на сустрэчы з заўзятарамі ў Менску. Лідар беларускай зборнай распавяла, што заўсёды рада выступаць за нацыянальную каманду, але не заўсёды гэта атрымліваецца. Азаранка падкрэсліла, што кожны прыезд дадому, у Менск, для яе свята, і таму ёй хочацца прысвяціць вольны ад турніраў час зносінам са сваёй сям’ёй, роднымі, а не даваць інтэрв’ю.
Прычым, падкрэсліла Віка, у яе няма нейкага негатыўнага стаўлення да журналістаў, проста хочацца часам адпачыць ад прэсы, пагутарыць, як цяпер, з заўзятарамі, асабліва юнымі. Адказваючы на пытанне аб далейшых планах, у прыватнасці, аб маючай адбыцца Алімпіядзе, Азаранка сказала, што мае намер гуляць у Рыа толькі ў адзіночным разрадзе, без выступлення ў спаборніцтвах змешаных пар.
Вікторыя Азаранка таксама распавяла, што акрамя тэніса ў яе шмат інтарэсаў у спорце. Ёй вельмі падабаецца футбол – „Я вялікая фанатка Ліянэля Месі і „Барселоны”. Калі бываю ў Парыжы, хаджу на матчы „Пары Сен-Жэрмен”, гэты клуб таксама вельмі падабаецца”. Адказваючы на пытанне юных тэнісістак – з кім цяжэй за ўсё гуляць і каго яна баіцца на корце, Азаранка сказала, што не баіцца нікога, „а гуляць вельмі цяжка супраць Серэны Уільямс, Ангелікі Кербер, ды шмат супраць каго. Затое па-за кортаў адносіны з усімі тэнісісткамі сусветнага тура прыязныя”, – падкрэсліла Віка.
Гаворачы аб тэме допінгу, у прыватнасці, праблеме Марыі Шарапавай, Азаранка адзначыла, што нельга рабіць нейкія высновы, не ведаючы сутнасці таго, што адбываецца, кожны спартовец рыхтуецца па-свойму, у кожнага свае падыходы і таму немагчыма даваць катэгарычныя ацэнкі.
Вікторыя Азаранка таксама сказала, што ёй вельмі хацелася б прывезці ў Беларусь наймацнейшых тэнісістак свету. Некалькі гадоў таму ў Менск прыязджала Каралін Вазняцкі, якая тады была першай ракеткай планеты, магчыма, у будучыні нешта падобнае зноў атрымаецца арганізаваць.
Падводзячы вынік, Вікторыя Азаранка пажадала сваім маладым калегам пабольш працаваць на трэніроўках, толькі тады можна дамагчыся вялікіх поспехаў на кортах. Нефармальныя зносіны завяршылася зацяжны фотасесіяй і раздачай аўтографаў беларускім заўзятарам.
Паводле БелТА
