Кнігі беларускіх пісьменнікаў прэзентавалі на кірмашы ў Беластоку



Дзве прэзентацыі кніжак беларускіх пісьменнікаў прайшлі ў апошні дзень Кніжнага кірмаша ў Беластоку. Сёлета Барыс Пятровіч і Алена Брава прэзентавалі першыя выданні сваіх твораў на польскай мове.

„Каменданцкі час для ластавак” – гэта ў вялікай ступені аўтабіяграфічная аповесць, кажа аўтарка Алена Брава.

– Я думаю, што будзе цікава пазнаёміцца польскім чытачам з назіраннямі жыцця кубінцаў і параўнаць жыццё кубінцаў і беларусаў. Бо гэта заўсёды вельмі цікава. А я вельмі пільна ўгладалася ў гэтыя калізіі жыцця і мне было цікава ведаць, чым гэтыя людзі адрозніваюцца ад нас.

Прэм’ера кнігі Барыса Пятровіча – гэта апісанне сучаснай гісторыі, што з’яўляецца рэдкім у беларускай літаратуры. 

– Кніжка крыху незвычайная і для Беларусі. Бо ў нас вельмі мала хто піша пра сучаснасць, у нас больш папулярная гістарычная літаратура ці ваенная тэматыка. А гэтая кніжка максімальна набліжаная да нашага часу. Падзеі там адбываюцца ў першыя гады незалежнасці Беларусі. Новая моладзь, з якой я сутыкаюся часам на прэзентацыях, ужо забылася ці не ведае тыя часы.

Кніжны кірмаш у Беластоку сабраў тысячы наведвальнікаў. Шэсць гадоў гэтае мерапрыемства аб’ядноўвае выдаўцоў, пісьменнікаў і чытачоў.

 

Уля Шубзда, Беларускае Радыё Рацыя, Беласток

Фота аўтара