“Лямцавая прастора” ад Дароты Сульжык



У Музеі і асяродку беларускай культуры ў Гайнаўцы адкрылася выстава Дароты Сульжык “Лямцавая прастора”.

Каляровыя шалі з лямцавай воўны і шоўку, кветкавыя брошкі, лямцавая біжутэрыя. “Я амаль ўсё рыхтавала адмыслова для гэтай выставы,” – кажа Дароты Сульжык:

– Як мне дырэктар прапанаваў гэтую выставу, то я не мела ў сваёй майстэрні амаль нічога, таму што я раблю на замову, і адразу да кліентаў тыя працы трапляюць. Гэта тры месяцы падрыхтоўкі. Я найбольш люблю працаваць з аранжывым, чырвоным, ружовым, зялёным, бронзавым колерамі. Такія колеры, якія мне даюць радасць.

“Я проста запраграмаваная на колер” – кажа пра сябе мастачка родам з падляшскага Гарадка, стваральніца майстэрні “Сундук”. Дарота Сульжык гэта 32-я асоба, якая ўвайшла ў “Слоўнік Беларускіх Мастакоў”, які выдаецца Гайнаўскім беларускім музеем. Выстава “Лямцавая прастора” будзе працаваць да канца красавіка.

Давід Гайко, Беларускае Радыё Рацыя

Фота аўтара