Польскія мытнікі затрымалі вайсковае абсталяванне
Генератары і рэгулятары напружання, якія выкарыстоўваюць, між іншым, у танках, затрымалі мытнікі на польска-беларускай мяжы. На памежным пераходзе Баброўнікі – Пяшчатка польскія функцыянеры затрымалі грамадзяніна Беларусі, які правозіў 10 адзінак вайсковага абсталявання.
Кажа прэс-сакратар беластоцкага аддзела Мытнай службы Мацей Чарнэцкі:
– Падазрэнне мытнікаў з Баброўнікаў выклікала 10 прылад, якія ў час мытнага кантролю задэклараваў 44-гадовы кіроўца беларускага грузавіка. У выніку пільнага дагляду і праверкі высветлілася, што гэтыя прылады з’яўляюцца элементамі баявых машын, на абарот якімі патрэбны спецыяльныя дазволы.
Супраць кіроўцы грузавіка Мытная служба пачала справу, якую вядзе Беластоцкая акруговая пракуратура разам з Агенцтвам унутранай бяспекі.
За абарот таварамі, якія маюць стратэгічнае значэнне для бяспекі дзяржавы, без дазволу пагражае пакаранне ад аднаго да дзесяці гадоў пазбаўлення волі.
Лукаш Леанюк, Беларускае Радыё Рацыя, Беласток
Фота: Podlaska Służba Celna
