У ваколіцах Заблудава спынілі нелегальную вытворчасць самагону



Супрацоўнікі Падляшскай падатковай адміністрацыі ліквідавалі самагонную фабрыку, якая працавала ў ваколіцах Заблудава, што ў Беластоцкім павеце.

Канфіскавана звыш 70 літраў нелегальнага алкаголю і абсталявання, якое выкарыстоўвалася для яго вытворчасці. Паведаміў прэс-сакратар падляшскіх мытнікаў Мацей Чарнецкі:

– Супрацоўнікі Падляшскай падатковай  адміністрацыі наведалі адну з ферм у гміне Заблудаў. Яны падазравалі, што 49-гадовы мужчына, які жыў там, вырабляў незаконны алкаголь. Іх высновы пацвердзіліся. Падчас ператрусу маёмасці супрацоўнікі выявілі поўную лінію па вытворчасці алкаголю і больш за 70 літраў самагону моцнасцю ад 50 да 90 адсоткаў. Супрацоўнікі КАS узбудзілі супраць мужчыны крымінальную справу, рэквізаваўшы алкаголь разам з абсталяваннем для яго вытворчасці. Цяпер 49-гадовы мужчына адкажа ў судзе. 

За незаконны выраб алкаголю мужчыне пагражае штраф, абмежаванне ці пазбаўленне волі на тэрмін да аднаго года.

Антон Разумоўскі, Беларускае Радыё Рацыя

Фота: podlaskie.kas.gov.pl