На востраве Уайт-Айленд у Новай Зеландыі абудзіўся вулкан
Актыўнасць вулкана на востраве Уайт-Айленд у Новай Зеландыі не дазваляе аварыйным і выратавальным службам пачаць аперацыю па пошуку прапаўшых без вестак у выніку вывяржэння, паведамляе ТАСС.
Паводле даных дзяржаўнай геалагічнай службы Новай Зеландыі, на востраве фіксуецца значная вулканічная актыўнасць і захоўваецца вялікая верагоднасць далейшых вывяржэнняў. Яны магчымы ў бліжэйшыя 24 гадзіны.
Як піша новазеландскі партал навін Stuff, прэм’ер-міністр Джасінда Ардэрн аб’явіла, што пошукава-выратавальныя каманды плануюць пачаць наземны пошук ужо 11 снежня. Пасля гэтай заявы адбыўся збор персаналу аварыйных і выратавальных службаў у аэрапорце Вакатаны, дзе быў адкрыты цэнтр экстраннага рэагавання. Пры гэтым на ранішнім брыфінгу выконваючы абавязкі памочніка камісара паліцыі Брус Берд адзначыў, што канчатковае рашэнне аб пачатку пошукавай аперацыі будзе прынята пасля кансультацыі з экспертамі і аналізу відэа з праляцеўшага над востравам беспілотніка.
Вулкан на востраве Уайт-Айленд пачаў дзейнічаць 9 снежня. Паводле даных паліцыі, у момант вывяржэння на востраве і ў навакольнай мясцовасці знаходзілася каля 50 чалавек. На гэты час 30 пацярпелых у бальніцах, 25 з якіх – у крытычным стане. Шэсць чалавек загінулі, яшчэ восем зніклі без вестак.
Фота stuff.co.nz
