Вераніка Урбэн: Першыя маніфестацыі салідарнасці з Украінай у Францыі арганізавалі беларусы
З плакатамі пра беларускіх палітвязняў і аповядамі пра іх крымінальныя палітычна матываваныя справы на кожную маніфестацыю ці акцыю выходзяць беларусы ў Францыі, нават у маленькіх гарадках. З моманту падзеяў 2020 году мінула два гады, але пытанне так і не вырашылася, – распавяла беларуска Вераніка Урбэн:
– На самой справе Беларусь – гэта мая радзіма. І мы з самага пачатку былі неабыякавымі да таго, што адбывалася і ў Беларусі, а потым ва Украіне. Мы нават рабілі маніфестацыю перад пачаткам вайны, каб выказацца супраць таго, што адбывалася ў Беларусі, тое што было шмат расейскіх ваенных. Гэта наша пазіцыя, мы – беларусы. Я нават не ведаю, як патлумачыць, гэта штосьці натуральнае для большасці беларусаў.
На кожную маніфестацыю мы выходзім з плакатамі нашых палітвязняў, нашых ваяроў, мы расказваем, як беларусы падтрымліваюць і ўкраінскі рух, і, нягледзячы на рэпрэсіі, яны вядуць рэйкавую вайну. Беларусы шмат паўплывалі нават на станаўленне ўкраінскага руху тут на месцы, таму што першыя маніфестацыі салідарнасці з Украінай былі арганізаваны беларусамі. Беларусы далі ўсе каардынаты з мэрыяй і прэфектурай, беларусы дапамаглі з узорамі лістоў, з усёй арганізацыяй, з парадамі. Роля беларусаў была шмат у каардынацыі: злучыць французскі бок, які хацеў дапамагаць, з украінскімі запытамі. І было шмат працы з мясцовымі дабрачыннымі арганізацыямі, з пошукам данатаў і перанакіраваннем іх у цэнтр уцекачоў. Было шмат прыкладаў псіхалагічнай дапамогі мясцовых беларусаў і нават беларускіх уцекачоў тут на месцы, якія знаходзячыся тут у менш добрых умовах, чым украінскія ўцекачы, дапамагалі псіхалагічна, дапамагалі інфармацыйна, праводзілі арт-тэрапію, беларусы прымалі ў сябе ўкраінцаў і нават удзельнічалі ў вырашэнні канфліктных сітуацый паміж сем’ямі, якія прымалі ўкраінцаў і самімі ўкраінцамі.
Цалкам размову можна паслухаць у далучаным аўдыёфайле:
Як адзначыла Вераніка Убрэн, беларусы Францыі як могуць падтрымліваюць Украіну і інфармуюць пра неабходнасць партызанскіх дзеянняў у самой Беларусі.
Беларускае Радыё Рацыя
