Агляд прэсы: самакрытыка на руінах
Расея павялічвае вайсковую прысутнасьць у Беларусі. Пуцін выйшаў са збожжавай здзелкі. Прэзідэнт ФРГ Штайнмаер заявіў пра «эпахальны пералом». Прэзідэнтам Бразіліі абраны Лула да Сілва. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Цяжка зразумець, што задумала Масква ў Беларусі. Расейскія войскі, тэхніка і знішчальнікі МІГ-31 пачалі прыбываць у Беларусь 15 кастрычніка. Мінабароны Беларусі заявіла, што разлічвае прыняць да 9 тысяч расейскіх вайскоўцаў. Цяжка паверыць на слова ні Менску, ні Маскве. Паколькі Расея пачала ўварванне ва Украіну ў лютым не толькі са сваёй тэрыторыі, але і з тэрыторыі Беларусі, гэтыя манеўры лёгка інтэрпрэтаваць як падрыхтоўку да новага наступу на Кіеў з поўначы», – піша нідэрландскае выданне Raam op Rusland.
«З пачатку вайны Украіна ахоўвае сваю паўночную мяжу. Таму сумнеўна, што той колькасці, якую, як чакаецца, размесціцца Расеяй у Беларусі, будзе дастаткова для чарговай атакі на Кіеў, нават з дадаткам беларускай арміі. Сярод беларусаў ёсць адзінае меркаванне, што яе войска не павінна ўдзельнічаць у вайне. Тым не менш, факт застаецца фактам, што Лукашэнка кіраваў эскалацыяй, як рэальнай, так і рытарычнай, і нельга выключаць, што ён сапраўды баіцца ваеннага або дыверсійнага нападу на Беларусь. Сотні беларускіх добраахвотнікаў ваююць на баку Украіны, і некаторыя з іх адкрыта гавораць пра сваю рашучасць зрынуць прарасейскую дыктатуру сваёй краіны пасля вайны. Тым часам беларуская апазіцыя, якая базуецца ў Літве і Польшчы, перажывае нейкую ўласную мілітарызацыю: у жніўні былы высокапастаўлены афіцэр міліцыі Аляксандр Азараў і падпалкоўнік у адстаўцы Валерый Сахашчык увайшлі ў кабінет Святланы Ціханоўскай у выгнанні ў якасці міністраў. Людзі ў форме Ціханоўскай прызналіся ў падрыхтоўцы розных сцэнарыяў змены рэжыму, у тым ліку сілавога адхілення Лукашэнкі. З гэтай мэтай Азараў і Сахашчык наладзілі сувязі з беларускімі добраахвотнікамі ва Украіне і прапанавалі беларусам курсы ваеннай падрыхтоўкі па ўсёй Усходняй Еўропе», – паведамляе нідэрландскае выданне.
Расея прыпыніла дзеянне заключанага ў ліпені пагаднення аб экспарце ўкраінскага збожжа. Масква абгрунтавала сваё рашэнне ўдарамі беспілотнікаў па Чарнаморскім флоце, у якіх абвінаваціла Украіну. Тым не менш, як паведамляецца, некалькі грузавых суднаў адпраўляюцца праз бяспечны калідор у бок Стамбула. Але невядома, ці прапусціць іх Расея. «Выйсцем са збожжавай здзелкі Крэмль найперш шкодзіць самому сабе», – прагназуе швейцарская газета Aargauer Zeitung.
«Украіна, па ўсёй бачнасці, прадбачыла яго рэакцыю – такім чынам, крамлёўскі ўладар яшчэ больш ізалюе сябе на міжнароднай арэне. І гэта ў момант, калі першапачатковыя саюзнікі, такія як Кітай і Індыя, паступова дыстанцуюцца ад Расеі. У штабе Зяленскага зразумелі, што адзін з нямногіх варыянтаў, якія яшчэ застаюцца Пуціну – гэта выхад са збожжавай здзелкі, якую крамлёўскія прапагандысты і так называлі абсурдам. І справакавалі распальшчыка вайны менавіта на такую рэакцыю. Калі ён пры першай жа магчымасці спрабуе выкарыстоўваць пагадненне аб збожжы як сродак аказання ціску, то гэта зусім ясна дае зразумець наступнае: з гэтым чалавекам не можа быць заключана ніякая здзелка», – падкрэслівае швейцарскае выданне.
У сваёй прамове аб становішчы спраў у краіне прэзідэнт ФРГ Франк-Вальтэр Штайнмаер назваў дзень 24 лютага 2022 года «эпахальным пераломам». У сваім 45-хвілінным звароце да нямецкага народа ён прызнаў, што ў сваёй палітыцы ў дачыненні да Расеі Германія за апошнія гады дапусціла мноства памылак, у тым ліку і ён асабіста. Не ўся еўрапейская прэса аддае належнае самакрытыцы прэзідэнта. Нямецкая газета Der Tagesspiegel не згодна з тым, што 24 лютага стала днём «эпахальнага пералому».
«У падобным чытанні выцясняецца ўся перадгісторыя, у тым ліку – уласныя памылкі і канфлікты, ілюзіі і прыкрыя пралікі. У гэтай прамове гаворыцца аб неабходнасці зацягнуць паясы і падрыхтавацца да таго, што будучыя гады будуць цяжкімі, а значыць, цалкам можна было б і папрасіць прабачэння перад усімі тымі, каго закранулі наступствы памылковай палітыкі Германіі ў дачыненні да Расеі: перад украінцамі, жыхарамі Усходняй Еўропы, немцамі, у рэшце рэшт, якія не ў стане аплачваць рахункі за электраэнергію. Падбадзёрлівая гаворка без прапрацоўкі мінулага сведчыць аб адсутнасці асабістай мужнасці», – адзначае нямецкае выданне.
Па выніках выбараў, якія прайшлі ў мінулую нядзелю ў Бразіліі, новым прэзідэнтам стане прыхільнік левых поглядаў Луіс Інасіу «Лула» да Сілва, які ўжо займаў у мінулым пасаду кіраўніка дзяржавы. Перавага мінімальная: Лула да Сілва атрымаў 50,90 адсоткаў галасоў, а за ягонага суперніка, дзейнага прэзыдэнта і прыхільніка ўльтраправых поглядаў Жаіра Балсанару, прагаласавалі 49,10 адсоткаў выбаршчыкаў. Перадвыбарная барацьба была вельмі жорсткай. Аглядальнікі выказваюць асцярогі наконт магчымай рэакцыі Балсанара і ўзнікнення расколу ў краіне. Французская газета Le Monde разважае над тым, ці пагодзіцца лагер Балсанару пакорліва перадаць уладу новаму прэзідэнту.
«Цяпер пытанне заключаецца ў тым, ці падпарадкуецца Жаір Балсанару рашэнню выбаршчыкаў. Бо за ўвесь час з моманту вяртання краіны да дэмакратыі ў 1985 годзе з усіх прэзідэнтаў, якія балатаваліся на другі тэрмін, ён стаў першым, хто не быў пераабраны. Пасля неаднаразовых выпадаў у адрас нібы «ашукальніцкай» сістэмы электроннага галасавання ў мінулую пятніцу ён заявіў: «Пераможа той, хто набярэ найбольшую колькасць галасоў. Гэта дэмакратыя, але вось якраз яму пераканаць народ і не ўдалося. У сувязі з гэтым многія асцерагаюцца таго, што ў Бразіліі можа адбыцца свой штурм Капітолія – па аналогіі з тым, што меў месца ў Вашынгтоне 6 студзеня 2021 года пасля паразы Дональда Трампа», – лічыць французскае выданне.
Агляд сусветнай прэсы падрыхтавала Вольга Сямашка.
Беларускае Радыё Рацыя
Array