Міжнародны дзень валанцёра
Па ініцыятыве ААН штогод 5 снежня адзначаецца як Міжнародны дзень валанцёра. Ён абвешчаны з галоўнай мэтаю – папулярызаваць дабрачыннасць, спрыяць павелічэнню ў краінах свету руху міласэрнасці ды павялічваць у людзей пачуццё ахвярнасці.
З гэтай нагоды наш карэспандэнт пацікавіўся ў жыхароў Пінска, як яны разумеюць паняцце “валанцёр”:
– Аказанне дапамогі людзям, якія ў ёй маюць патрэбу.
– Для людзей, якія трапілі ў бяду, збіраюць рэчы, грошы.
– Калі шчыра, я расшыфроўку гэтага слова толкам не разумею. Проста рабі дабро, калі ў цябе ёсць магчымасць. Дапамагай, чым можаш. Чаму абавязкова ў грашах? Можа, камусьці трэба дапамагчы перайсці дарогу, можа, камусьці трэба сумку данесці.
– Калі ты бачыш, што хтосьці пакутуе і ты можаш яму дапамагчы, то абавязкова трэба гэта зрабіць.
– Дапамагаць. Стараемся дапамагаць старым людзям, а канкрэтна ў валанцёрскім руху – не.
Праграма дабрачыннага руху ААН абазначыла сёлетняе 5-е снежня дэвізам “Салідарнасць праз валанцёрства”. Сэнс у тым, каб падкрэсліць моц калектыўнай чалавечнасці, неабходнай для таго, каб дабіцца пазітыўных зменаў праз добраахвотніцтва.
Беларускае Радыё Рацыя
