Жыхара Пінска за абразу прадстаўніка ўлады асудзілі да «хатняй хіміі» другі раз
Жыхара Пінска за абразу прадстаўніка ўлады асудзілі да «хатняй хіміі» другі раз.
У судзе Пінскага раёна і Пінска за абразу прадстаўніка ўлады (арт. 369 КК) быў асуджаны мясцовы 35-гадовы жыхар Дзяніс Стасевіч. Гэта другі прысуд, які вынеслі па гэтым артыкуле Дзянісу. Справу разглядала суддзя Яўгенія Мельнік.
Першы прысуд Стасевічу быў вынесены за абразу супрацоўніка ДАІ Ігара Вольніча. За каментар у «Аднакласніках», які ён пакінуў ў дачыненні да супрацоўніка ДАІ, які наступіў затрыманаму чалавеку каленам на галаву, суд прысудзіў яму два гады «хатняй хіміі» і 1000 рублёў кампенсацыі маральнай шкоды.
Па матэрыялах новага абвінавачання, Дзяніс абразіў камандуючага сіламі спецыяльных аперацый Узброеных Сіл Рэспублікі Беларусь Вадзіма Дзенісенку — ён пакінуў каментар, «які змяшчае негатыўную і зневажальную па форме ацэнку асобы».
З улікам неадбытага пакарання суд пастанавіў прызначыць Дзянісу тры гады «хатняй хіміі».
