Агляд прэсы: лепшыя часы яшчэ наперадзе
Калядны сюрпрыз ад Уладзіміра Пуціна закладзены ў Беларусі. Што азначае сустрэча Зяленскага і Байдэна? Урад Славакіі працуе ва ўмовах вотуму недаверу. Нідэрланды спрабуюць скінуць каланіяльны груз. Падрабязнасці свежых матэрыялаў замежнай прэсы ў аглядзе Вольгі Сямашкі.
«Набліжаюцца Каляды, і нешта не так. Аналітыкаў ваеннай выведкі вучаць давяраць сваім інстынктам — пачуццям Спадзі. Калі яны пачынаюць паколваць, вы даследуеце. Ва Украіне нешта не так. Шмат шуму, але мала сігналу», – піша амерыканская газетаThe Washington Examiner.
«Лепшыя падманы ў ваеннай гісторыі – гэта тыя, якія былі самымі праўдападобнымі. Найбольш вядомым і паспяховым падманам, магчыма, была аперацыя «Трываласць» і падтрымка ўварвання ў Нармандыю ў 1944 г. Прыманкі ваеннай тэхнікі былі разгорнуты і зроблены бачнымі для фатаграфавання нямецкімі самалётамі-выведвальнікамі, а радыёсувязь, усталяваная паміж выдуманымі адзінкамі, зрабіла ўсё праўдападобным. Нават наўмысна абвешчаная тэлеграфам кропка пасадкі ў Кале, Францыя, мела стратэгічны сэнс. Ці бачым мы цяпер нешта падобнае ў Беларусі? Беларусь апошнім часам вельмі актыўная. Міністр абароны Расеі Сяргей Шайгу і прэзідэнт Уладзімір Пуцін нядаўна правялі перамовы ў Менску. Шайгу падпісаў пратакол «аб унясенні змяненняў у расейска-беларускае міждзяржаўнае пагадненне аб сумесным забеспячэнні рэгіянальнай бяспекі ў ваеннай сферы». Сустрэчы Пуціна і Лукашэнкі папярэднічала фармаванне сумеснай вайсковай групоўкі і пазачарговая комплексная праверка боегатоўнасці 13 снежня. Падман прадугледжвае дзеянні, накіраваныя на ўздзеянне і ўвядзенне ў замяшанне, чаго і дасягнула Расея. Прэс-сакратар Крамля Дзмітрый Пяскоў адхіліў думку пра тое, што Расея мае намер аднавіць беларускі фронт супраць Украіны. Але гэта той самы Пяскоў, які ў лютым адхіліў папярэджанні Вашынгтона пра тое, што Расея плануе ўварвацца ва Украіну. Між тым у сацыяльных сетках працягваюць з’яўляцца выявы расейскай ваеннай тэхнікі ў чыгуначных вагонах, якія рухаюцца да мяжы, а таксама бесперапынныя здагадкі ваенных аналітыкаў, якія падмацоўваюць наратыў. Усе погляды скіраваныя на Беларусь, а менавіта туды, хутчэй за ўсё, куды хоча Пуцін. Чаго нам не хапае? Ці ёсць у Пуціна калядны сюрпрыз для Украіны і Захаду, пакуль прэзідэнт Уладзімір Зяленскі перадае ў Белы дом баявы сцяг Бахмута? Калі Беларусь — гэта падман, то гэта, безумоўна, вельмі праўдападобна. Нешта не так, і выведвальная супольнасць павінна праліць святло на наступны крок Пуціна», – падкрэслівае амерыканскае выданне.
***
У хадзе сваёй першай замежнай паездкі з пачатку расейскага ўварвання прэзідэнт Украіны Зяленскі наведаў ЗША. Пасля сустрэчы з прэзідэнтам Байдэнам ён выступіў перад Кангрэсам, дзе быў сустрэты працяглымі авацыямі. Еўрапейская прэса разважае пра значнасць візіту і сустрэч, якія адбыліся. «У Захада ёсць усе падставы для працягу падтрымкі Украіны, у тым ліку і дзеля сябе самога», – адзначае брытанская газета The Daily Telegraph.
«Зяленскаму не трэба было прыязджаць на Захад у якасці прасіцеля: усё павінна быць роўна наадварот. Украіна фактычна знішчыла рэпутацыю расейскага войска, якога раней усе так баяліся, і ўхіліла яе ў якасці пагрозы для НАТО. Ёсць усе падставы меркаваць, што калі Расея будзе пераможана, то ў доўгатэрміновай перспектыве Еўропа зможа засяродзіць сваю ўвагу на росце эканомікі і дабрабыту. Гэта стане ўзнагародай для Еўропы, калі мы будзем і надалей падтрымліваць Зяленскага і яго краіну ў іх натхняльнай барацьбе за дэмакратыю і незалежнасць», – заклікае брытанскае выданне.
***
Пасля таго як ураду пад кіраўніцтвам Эдуарда Хегера быў вынесены вотум недаверу, ён з гэтага часу функцыянуе толькі ў якасці выконваючага абавязкі. Аглядальнікі выказваюць асцярогі наконт палітычнай будучыні краіны, і сітуацыі, у якой апынулася насельніцтва Славакіі. «Цяпер самае галоўнае – скласці план бюджэту на наступны год», – піша славацкая газета Új Szó.
«Для таго каб прадухіліць калапс эканомікі, партыі ў парламенце павінны хаця б на нейкі час адсунуць на задні план свае эгаістычныя інтарэсы, і як мага хутчэй знайсці рашэнне, якое вывела б нас з тупіку, у які гэтыя партыі нас, уласна, і завялі. Перш чым яны пагрузяцца ў працяглыя дэбаты наконт даты правядзення датэрміновых выбараў, ім неабходна дамовіцца пра бюджэт на наступны год. А таксама пра тое, якім чынам яны маюць намер знізіць нагрузку, якая абрынулася на плечы грамадзян, муніцыпалітэтаў, бізнесу, школ і бальніц у сувязі з ростам цэн на электраэнергію», – папярэджвае славацкае выданне.
***
Амаль праз 150 гадоў пасля адмены рабства ў галандскіх калоніях цяперашні прэм’ер-міністр Нідэрландаў Марк Рутэ ад імя краіны прынёс прабачэнні тым, хто быў заняволены ў каланіяльную эпоху, а іх колькасць вылічаецца прыкладна 600 тысячамі, а таксама іх нашчадкамі. Аглядальнікі разважаюць пра тое, што, уласна, павінна рушыць услед за выбачэннямі. «Гаворка павінна ісці і пра тое, каб галандцы зразумелі, якія прывілеі яны змаглі займець, дзякуючы рабаванню ў эпоху каланіялізму», – з такім патрабаваннем выступае нямецкая газета Frankfurter Allgemeine Zeitung.
«І дагэтуль Нідэрланды атрымліваюць выгаду з багацця, набытага вельмі сумнеўным чынам у «залатое стагоддзе». «Нязручныя» дыскусіі дапамогуць сфарміраваць усведамленне гэтага факту – бо проста навязаць зверху такое разуменне немагчыма. Але не варта выпускаць з-пад увагі самага галоўнага, а менавіта таго, што, як сказаў Рутэ, ганебнае мінулае і сёння «з усёй сілы б’е’»па роўнасці шанцаў і магчымасцяў», – адзначае нямецкае выданне.
Агляд сусветнай прэсы падрыхтавала Вольга Сямашка.
Array