Блогер Андрэй Павук: Нарэшце ўзнагародзілі і мяне
Міністэрства ўнутраных справаў Беларусі прызнала блогерскі праект “Рудабельская паказуха” экстрэмісцкім фармаваннем. Пра гэтую навіну паведамілі некалькі праўладных паблікаў, блізкіх да сілавых структур. Міліцыянты палохаюць людзей санкцыямі за кантакты з прадстаўнікамі “Рудабельскай паказухі”. Паводле артыкула 361-1 Крымінальнага кодэксу РБ удзел у “экстрэмісцкім фармаванні” караецца тэрмінам да 7 год пазбаўлення волі.
Стваральнік “Рудабельскай паказухі” Андрэй Павук аджартоўваецца, што новы экстрэмісцкі статус стаў для яго стымулам для далейшай працы.
– Для чаго яны гэта робяць? Каб запалохаць. Раней адмінку давалі за тое, што знойдуць у каго падпіску, а цяпер могуць крыміналку даваць. Зараз я адчуваю, калі я стаў экстрэмісцкім фармаваннем, што гэта для мяне знак, як зваротная сувязь, нарэшце. Таму што я ўжо стаў расчароўвацца ў сваёй працы, стаміўся і ўсё такое. А тут опа – і ўзнагародзілі.
Блогер Андрэй Павук пачынаў з асвятлення сацыяльных праблем у пасёлку Акцябрскі Гомельскай вобласці. Цяпер ён запісвае рэзанансныя відэа пра найбольш адыёзных прадстаўнікоў рэжыма Аляксандра Лукашэнкі. У многіх сюжэтах “Рудабельскай паказухі” сілавікі і чыноўнікі фігуруюць не ў найлепшым выглядзе.
Беларускае Радыё Рацыя
