Нацбанк падтрымлівае прапанову МВФ
Савет па забеспячэнні фінансавай стабільнасці, які Беларусі рэкамендуе стварыць МВФ, варта сфармаваць, заявіў на прэс-канферэнцыі 6 траўня ў Менску старшыня праўлення Нацыянальнага банка Павел Калаур, адказваючы на пытанні БелаПАН.
„Пазіцыя Нацыянальнага банка адназначная — такі савет неабходны”, — сказаў Калаур. Ён падзякаваў экспертам красавіцкай місіі МВФ „за тое, што яны ўнеслі свае прапановы па функцыянальным напаўненні працы гэтага савета”.
„Адпаведныя прапановы накіраваныя ва ўрад, і мы разлічваем, што ўрад іх падтрымае. Мяркуецца, што сустаршынямі савета па фінансавай стабільнасці будуць старшыня Нацбанка і першы намеснік прэм’ер-міністра”, — паведаміў Калаур.
Ён адзначыў, што высновы красавіцкай місіі МВФ, якая вывучала фінансавы сектар Беларусі, Нацыянальны банк падзяляе. „У нас адбылася плённая сумесная праца, і яе вынікі мы будзем выкарыстоўваць у сваёй працы”, — растлумачыў Калаур.
Паводле інфармацыі БелаПАН, эксперты МВФ, якія ў межах красавіцкай місіі правялі серыю сустрэч з прадстаўнікамі органаў дзяржкіравання і банкаў, прыйшлі да высновы, што ў банкаўскай сістэме існуе павышаны ўзровень рызык, звязаных у першую чаргу з пагаршэннем фінансавага становішча дзяржпрадпрыемстваў.
Згодна з ацэнкай МВФ, крэдытная рызыка, якая можа рэалізавацца ў выпадку пагаршэння плацежаздольнасці найбуйнейшых пазычальнікаў, з’яўляецца асноўным фактарам уразлівасці беларускіх банкаў.
Беларускія эканамісты лічаць, што прапановы МВФ аб стварэнні на дзяржаўным узроўні савета па забеспячэнні фінансавай стабільнасці з’яўляюцца апраўданымі.
belapan.by
Array