У Беларусі хочуць пабудаваць новы круізны карабель

таму

Выдрукаваць Пракаментаваць (0) Падзяліцца

Самым паспяховым з камерцыйнага пункту гледжання праектам у беларускім суднаходстве з’яўляецца круізны маршрут па Прыпяці на цеплаходзе “Белая Русь”. Таму Мінтранс плануе вывесці на яго яшчэ адно новае судна, паведамляе Рэспубліканскі саюз турыстычнай індустрыі.

Новы карабель можа быць пабудаваны на Пінскім суднабудаўніча-суднарамонтным заводзе. Але ў Беларусі практычна не засталося адмыслоўцаў для суднабудавання. Таму завод абяцаюць “танна” аддаць інвестару, які гатовы будаваць караблі для рачнога суднаходства.

“Няма сэнсу пяць гадоў карабель будаваць, як гэта было з “Белай Руссю”, яго трэба за дзевяць месяцаў сабраць і на ваду спусціць. Пры гэтым судна можа хадзіць пад расейскім сцягам. Падпісана пагадненне, якое дазваляе зарэгістраваць карабель у расейскім рэестры судоў, і гэта можа быць цалкам расейскі аб’ект нерухомасці. А ў нас будзе свабоднае параходства для іх”, – заявіў начальнік упраўлення марскога і рачнога транспарту Мінтранса Андрэй Чарнобылец, піша Office Life.

Якія расейскія парты выкарыстоўвае Беларусь?

Першы намеснік міністра транспарту і камунікацый Аляксей Ляхновіч распавёў, якія расейскія парты выкарыстоўваюцца для перавалкі беларускіх грузаў, а таксама закрануў пытанне будаўніцтва ўласнага тэрмінала.

“Мы задзейнічалі 19 расейскіх партоў у розных рэгіёнах РФ. Гэта і калідор “Поўнач — Поўдзень” у бок Астрахані і праз Каспійскае мора, гэта і парты Санкт-Пецярбурга, парты Чорнага і Азоўскага мораў. Таксама мы перавозім грузы сухапутным маршрутам у бок Кітая. Па выніках першага паўгоддзя ў нас склаліся аб’ёмы перавалкі грузаў каля шасці млн. тон праз парты і каля 1,5 млн. тон сухапутным маршрутам на Кітай”, — сказаў Аляксей Ляхновіч у інтэрв’ю тэлеканалу “Беларусь 1”.

Найбольш задзейнічаныя, па яго словах, вялікі порт Санкт-Пецярбурга і іншыя парты на Балтыйскім моры.

Складзены топ-10 самых запатрабаваных у Беларусі прафесій

Спецыялісты даследчага цэнтра rabotа.bу прааналізавалі, якія прафесіі былі найбольш запатрабаваны ў Менску і рэгіёнах у другім квартале 2023 года. Даследаванне праводзілася на падставе апублікаваных у красавіку – чэрвені вакансій і рэзюмэ на сайце rabota.by.

У Менску найбольш запатрабаванымі былі менеджары і спецыялісты па продажах або па працы з кліентамі, а таксама адміністратары.

У Берасцейскім рэгіёне ў вакансіях у топ-10 увайшлі прыбіральшчыкі, кухары і слесары. У Віцебскай вобласці наймальнікі шукалі кантралёраў-касіраў, повараў, прыбіральшчыкаў і слесараў. У Гомельскай вобласці ад наймальнікаў былі прапановы для повараў, слесараў і прыбіральшчыкаў.

У Гарадзенскай вобласці ад працадаўцаў былі распаўсюджаныя вакансіі для кухараў, грузчыкаў, кантралёраў-касіраў, слесараў і прыбіральшчыкаў. У Магілёве і Магілёўскай вобласці наймальнікі таксама былі зацікаўлены ў падборы повараў, слесараў і прыбіральшчыкаў.

На AliExpress увялі ПДВ у 20% на замовы з Беларусі

Беларускія карыстальнікі, якія робяць заказы на AliExpress, сталі заўважаць у інфармацыі пра замову з’яўленне радка аб падатку на дададзеную вартасць (ПДВ) у 20%. Адпаведна вырасла і цана, піша mogilev.online.

Аказваецца, што гэта звязана са зменамі ў Падатковым кодэксе Беларусі. Падрабязны каментар на гэты конт даў спецыялізаваны паблік “АліЭкспрэс Беларусь”. “У канцы 2021 года былі прынятыя папраўкі ў дзейны Падатковы кодэкс Беларусі, якія прадугледжваюць абавязковую выплату замежнымі інтэрнэт-крамамі ПДВ 20%”. З паведамлення таксама вынікае, што такім чынам улады Беларусі хочуць зраўняць умовы працы замежных аб’ектаў з айчыннымі, якія часта не могуць прапанаваць нізкія цэны.

Беларускае Радыё Рацыя.