Максім Плешко: Беларусь пры Лукашэнку раўняецца на Паўночную Карэю
На заходнюю падтрымку еўрапейскіх памкненняў беларусаў у выгнанні рэжым Лукашэнкі адказаў ідэяй стварэння альянсу з Расеяй і КНДР, якая і была агучана на апошняй сустрэчы ў Пуціным у Сочы 15-га верасня. Акрамя гэтага Лукашэнка і Пуцін абмеркавалі імпартазамяшчэнне, прамысловую вытворчасць, рэалізацыю інтэграцыйных праграм. Пры гэтым колькасць расейскіх ваенных у Беларусі скарацілася да 2 000 чалавек.
Наша калега, Вольга Сямашка пагутарыла з кіраўніком Цэнтра беларускіх камунікацый Максімам Плешко пра тое, як можна вызначыць усё больш шчыльныя сувязі паміж Беларуссю і Расеяй і што зараз уваходзіць у сферу цікавасці Лукашэнкі; куды сышлі расейскія вайскоўцы з Беларусі і ці чакаюць ахоўнікаў Лукашэнкі ў Афрыцы; калі можа скончыцца вайна ва Украіне і ці датрываюць да гэтага адносіны Украіны і Польшчы:
РР: Якое вашае ўражанне ад паездкі Лукашэнкі ў Сочы да Пуціна, пра што яны гаварылі, ці можам мы казаць, што Лукашэнка здаў краіну пад расейскі ўплыў, і гэтая сустрэча выглядае як сустрэча губернатара з прэзідэнтам?
— Гэта акурат так і выглядае, бо Лукашэнка чакаў, што Пуцін пакліча яго. Ён так бы ўяўляў, сяджу з аднаго боку я, Аляксандр Рыгоравіч, пасярэдзіне Пуцін, і ўсе краіны ад Беларусі да Паўночнай Карэі, тры дзяржавы, што валодаюць атамнай зброяй. Але Пуцін такой асалоды яму не даў.
РР: Лукашэнка ўвесь час намякае, што Беларусь не будзе ўступаць у вайну. Ён абмовіўся, што можа быць нейкі альянс паміж Беларуссю, Расеяй і Паўночнай Карэяй. Як вы гэта бачыце?
— De-facto гэты альянс і так ужо ёсць, хіба без Беларусі. А Лукашэнка там проста прытанцоўвае, не маючы фактычнага ўласнага суверэнітэту, робячы выгляд, што ён суб’ект. Але Беларусь пры рэжыме Лукашэнкі, яна не ёсць суб’ектам міжнародных стасункаў.
РР: У сваім выступе на генеральнай асамблеі ААН, Уладзімір Зяленскі намякнуў на тое, што ёсць непаразуменне вакол „аграрнага пытання“ між Украінай і суседнімі краінамі, у тым ліку, Польшчай. Як вы разумееце гэтую сітуацыю? Чаму так адбываецца? І ці праўда Расеі гэта карысна?
— Расеі гэта карысна. Украіна тонка ўспрымае гэтыя моманты. Але мы таксама разумеем гэта з іншага боку. Польшча адчыніла дзверы мільёнам украінцаў. Польшча мае свае нацыянальныя інтарэсы. Мы разумеем, што ў Польшчы выбары, і разумеем, што фермеры – гэта вялікая электаральная база ў Польшчы. І цямна, што Польскі ўрад мае ўлічваць гэта, і гэта ўплывае на працэс. Сённяшнія збожжавыя праблемы на тле глабальнага, яны ёсць проста часовымі сітуацыямі, што развяжуцца, імаверна, пасля выбараў у Польшчы.
15 кастрычніка ў Польшчы пройдуць выбары ў Сойм і Сенат. Усе выказванні і дзеянні польскіх палітыкаў у гэты перыяд даводзіцца разглядаць праз прызму выбарчай кампаніі: у сельскай гаспадарцы Польшчы занятыя амаль 20% працаздольнага насельніцтва краіны, і практычна ўсе ўгоддзі знаходзяцца ў прыватных руках.
Вольга Сямашка, Беларускае Радыё Рацыя
