Палітзняволеную Алену Гнаук выдалілі з судовага пасяджэння
Палітзняволеную Алену Гнаук 18 красавіка выдалілі з судовага пасяджэння.
Пружанскую актывістку, асуджаную да 3,5 гадоў калоніі, цяпер судзяць за „злоснае непадпарадкаванне патрабаванням адміністрацыі папраўчай установы”.
Нядаўна яе змясцілі ў ПКТ да 24 лютага, а перад гэтым часта адпраўлялі ў ШІЗА. Таксама Алену пазбавілі амаль усіх перадач, званкоў, спатканняў і скарацілі атаварку. У зняволенні ў жанчыны пагоршылася здароўе.
Суд Чыгуначнага раёна Гомеля пачаў разгляд справы 11 красавіка на выязным пасяджэнні ў гомельскай калоніі. Справу разглядае суддзя Яраслаў Парэмскі.
Працяг суда адбыўся 18 красавіка. Дапытвалі сведкаў, якія блыталіся ў адказах, а саму палітзняволеную выдалілі з залі суда. Суд абвесціў перапынак да 28 красавіка.
