Улады Піншчыны заклікаюць з’ехаўшых праз рэпрэсіі беларусаў вяртацца
Стала вядома, што на Піншчыне сваякам некалькіх грамадзянак, якія з’ехалі за мяжу пасля распачатых у краіне рэпрэсій, прапанавалі перадаць, каб іх блізкія вярталіся праз зварот у адмысловую камісію. У сітуацыі цікавае тое, што жанчын не прыцягвалі ні да адміністрацыйнай ні да крымінальнай адказнасці па “палітычных артыкулах”.
Грамадская дзяячка Вераніка Іванова адзначае, што гэтыя канкрэтныя пінчанкі наўпрост выехалі ў пошуках лепшай долі:
– Калі тут пачаўся гвалт, зразумелі, што тут перспектывы няма, яны з’ехалі, і пачалі будаваць сваё жыццё там. Да іх сваякоў прыходзілі з гутаркамі, што „вы не хвалюйцеся, вярнуцца – абсалютна бяспечна. Вы ім проста скажыце, каб яны звярталіся ў камісію.” Маё асабіста меркаванне – так як вала зваротаў не з’явілася – , сталі чапляцца не толькі за тых, каго яны падазраюць у здзяйсненні нейкіх злачынстваў, а ў прынцыпе да ўсіх, у каго зразумелая тэндэнцыя, што ён не жадае тут жыць, і будуе сваё жыццё за мяжой.
Суразмоўца мяркуе, што так званай “камісіі па вяртанню”, якую ўтварылі ў лютым бягучага году, бракуе зваротаў. Таму прапановы паступаюць у тым ліку і тым, хто не з’яжджаў у “палітычную эміграцыю”, а спрабуе ўладкаваць новае жыццё у замежжы.
Беларускае Радыё Рацыя, эксперт
