„Гліняны Вялес” паведаміў свой шорт-ліст за 2022 год
Нягледзячы на ўсё складанасці апошняга часу беларускія кнігі працягваюць выходзіць, іх чытаюць і абмяркоўваюць. Працягваюць працаваць і незалежныя беларускія літаратурныя прэміі, у якіх гэтыя кнігі разглядаюцца, ацэньваюцца і ўзнагароджваюцца. Сярод іх старэйшая незалежная літпрэмія «Гліняны Вялес», якая была заснавана Таварыствам Вольных Літаратараў у 1993 годзе.
Мінулы год бадай быў найбольш складаным для «Вялеса». Перадусім гэта звязана з тым, што няпроста было адсочваць кніжныя навінкі. Да таго ж шэраг незалежных беларускіх выдавецтвах былі пазбаўлены ліцэнзій і прыпынілі сваю дзейнасць – «Галіфы», «Янушкевіч», «Лімарыус», «Кнігазбор» і інш. Але кнігавыдавецкую эстафету пераймаюць выдавецтвы, заснаваныя ў замежжы. Таму не спыніць, не стрымаць. І вось мы маем чарговы шорт-ліст «Вялеса».
Сёлета ў шорт „Вялеса” трапілі 4 кнігі паэзіі і ніводнай кнігі чыстай белетрыстыкі. Што вельмі паказальна для мінулага беларускага літаратурнага года. Ну і ўпершыню ў шорце „Вялеса” перавага за жанчынамі.
Шорт-ліст літаратурнай прэміі «Гліняны Вялес -2022»
Зміцер Бартосік. Забіць упалмінзага. «Бібліятэка Свабоды»
Максім Знак. Зэкамэрон. «Беларуская турэмная літаратура». Праваабарончы цэнтр «Вясна»
Ганна Кандрацюк. У прысценку старога лесу. Гісторыі людзей з Белавежскай пушчы. Праграмная рада тыднёвіка «Ніва»
Наста Кудасава. Святлана Дземідовіч. Побач. «Цымбераў»
Сяргей Лескець. Шэпт. Выдавецкая каманда «Вільма»
Антаніна Хатэнка. Вербніца. «Кнігазбор»
Юля Цімафеева. Воўчыя ягады. «Весна»
Беларускае Радыё Рацыя
Array