Пра адзіны музей сям’і ў Беларусі
У час святкавання „Тыдня бацькоўскай любові”, які праходзіць ва ўстановах адукацыі Беларусі з 14 па 21 кастрычніка, вучні 11-й лідскай школы супольна з настаяцелем храма Усіх Святых пратаіерэем Уладзімірам Яромічам здзейснілі цікавае падарожжа, каб яшчэ больш пачуць пра значэнне сям’і і ўбачыць усё на свае вочы. Дзеці наведалі аграгарадок Бердаўка, дзе пазнаёміліся з гісторыяй мястэчка, убачылі цікавыя аб’екты і, галоўнае, завіталі ў культурна-дасугавы цэнтр, дзе створаны адзіны ў Беларусі музей сям’і. Што адразу прыцягнула ўвагу юных турыстаў, дык гэта незвычайны будынак. Так, музей сям’і быў заснаваны ў 2017 годзе, а размясціўся ў пакоях сядзібы Аляксандра Дамбавецкага, значнага дзяржаўнага і грамадскага дзеяча сярэдзіны ХIХ – пачатку ХХ стагоддзя, губернатара горада Магілёва. Чым жа ўразіў Музей сям’і сучасных падлеткаў, чытачы даведаюцца са свежага электроннага нумару газеты “Наша слова.pdf”.
У выставачнай зале Лідскага замка адкрылася выстава карцін лідскага мастака Уладзіміра Мельнікава „Жыццё кароткае – мастацтва вечнае”. Адкрылася яна ў дзень нараджэння мастака, якому споўнілася б 84 гады. На жаль, за тры месяцы да гэтай даты Уладзіміра Сяргеевіча не стала. Але памяць пра яго жыве, прадаўжаюць сваё жыццё яго шматлікія карціны. Выстава памяці таленавітага і вядомага мастака, якая адкрылася, будзе працаваць доўгі час і папаўняцца іншымі яго творамі.
Уладзімір Мельнікаў як мастак пакінуў вялікую спадчыну. Ён пісаў у розных жанрах, але ўлюбёным яго жанрам быў партрэт. У партрэтах мастаку ўдавалася перадаць стан душы чалавека, яго характар і тэмперамент. Шмат вядомых людзей Беларусі ўвасобіў Уладзімір Мельнікаў у сваіх работах.
З-пад пэндзля мастака выйшлі партрэты Уладзіміра Мулявіна, Анатоля Ярмоленкі, Ганны Радзько, Уладзіміра Ліпскага, Ніла Гілевіча і многіх іншых. Дарэчы, падчас працы Уладзіміра Сяргеевіча у сярэдняй школе №14 горада Ліды Анатоль Ярмоленка і Ніл Гілевіч былі гасцямі згаданай школы. Пра гэта таксама піша свежы нумар “Нашага слова”.
Публікуе газета і шмат іншых цікавых матэрыялаў. Увесь нумар можна пачытаць тут.
Беларускае Радыё Рацыя
