Сёння ўшаноўваюць памяць святога Андрэя Баболі
На Берасцейшчыне сёння ўшаноўваюць памяць нябеснага заступніка беларускага Палесся – Андрэя Баболі. Урачыстыя набажэнствы пройдуць у касцёле Узвышэння Святога Крыжа, што ў Янаве (Іванава), таксама запланаваная малітва вернікаў каля Крыжоў Адзінства і святочны канцэрт арганнай музыкі.
Жыццё святога Андрэя Баболі неразрыўна звязанае з Палессем. Нават пасля пакутніцкай смерці яго мошчы 150 гадоў захоўваліся ў Пінску, адзначае гісторык Святлана Лазюк:
– Касцёл святога Станіслава ў Пінску з’яўляўся самым вялікім касцёлам Езуітаў на тэрыторыі Вялікага Княства Літоўскага. У касцёле святога Станіслава была капліца святога Андрэя Баболі, да 1800 года мошчы святога Андрэя Баболі знаходзіліся ў нас у Пінску.
Апошнія пятнаццаць гадоў зямнога жыцця Андрэй Баболя служыў на Піншчыне, працаваў у мясцовым калегіуме езуітаў. Яго кананізацыя адбылася ў красавіку 1938 года, а мошчы цяпер захоўваюцца ў Варшаве.
Беларускае Радыё Рацыя
