Агляд прэсы: без агульнага еўрапейскага дома
ЕЗ адмяніў спрошчаны парадак выдачы віз расейцам. У Нідэрландах узгоднены меры дапамогі насельніцтву ў выніку інфляцыі. Гарбачоў: каму – герой, а каму – здраднік? Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Ключавым выключэннем сярод постсавецкіх краін стала Беларусь. За апошняе дзесяцігоддзе прэзідэнт Аляксандр Лукашэнка мэтанакірана накіраваў Беларусь у арбіту Расеі. Спакушаны таннымі расейскімі нафтай і газам і прыбытковымі транзітнымі зборамі, паколькі абодва гэтыя тавары працягваюць ісці ў Еўропу, Лукашэнка таксама ўсё больш разлічвае на расейскія сілы бяспекі, каб забяспечыць захаванне свайго праўлення, асабліва пасля беларускіх пратэстаў 2020 года», – піша газета Asia Times.
«Беларусь працягвае дапамагаць расейскай ваеннай кампаніі, у тым ліку дазваляючы Расеі запускаць балістычныя ракеты з тэрыторыі Беларусі, забяспечваючы перавозку расейскіх вайскоўцаў і цяжкіх узбраенняў, танкаў і ваенных транспартнікаў, дазваляючы расейскім ваенным самалётам пралятаць над паветранай прасторай Беларусі ва Украіну, забеспечваючы аўтазаправачныя пункты і захоўванне расейскіх узбраенняў і ваеннай тэхнікі ў Беларусі. Беларусь таксама неаднаразова перамяшчала ўласныя войскі паблізу ўкраінскай мяжы з пачатку ўварвання Расеі, каб адцягнуць увагу ўкраінскіх сіл. І хаця Беларусь не задзейнічала свае ўзброеныя сілы ва ўкраінскім канфлікце, Расея фактычна атрымала доступ да патоку замежных добраахвотнікаў, у асноўным з Еўропы, з моманту першых ваенных дзеянняў Расеі ў Крыме ў 2014 годзе», – паведамляе азіяцкае выданне.
***
У будучыні грамадзянам Расеі будзе складаней атрымаць шэнгенскую візу: крытэрыі будуць больш строгімі, разгляд хадайніцтваў – больш працяглым, а візавы збор – даражэйшы. Міністры замежных спраў краін ЕЗ дамовіліся прыпыніць дзеянне пагаднення аб спрашчэнні візавага рэжыму ад 2007 года. Пытанне аб поўным спыненні выдачы турыстычных віз пакуль не разглядаецца. Аглядальнікі крытыкуюць гэтае кампраміснае рашэнне.
Як адзначае нямецкая газета Frankfurter Allgemeine Zeitung, падчас цяперашняй спрэчкі аб візах ізноў выразна выявілася розніца ў тыпах мыслення, якія раскалвалі Еўропу яшчэ да нападу Пуціна на Украіну.
«Германія і Францыя да гэтага часу вераць у тое, што на іншыя народы можна ўздзейнічаць педагагічна, тады як усходнія еўрапейцы працягваюць рабіць стаўку на ціск. І сапраўды, вельмі сумнеўна, каб паездка ў адпачынак у ЕЗ змагла пракласці дарогу да «сэрцаў і розумаў» расейцаў, як мяркуюць міністры замежных спраў Бэрбак і Калона. Хіба Берлін не абяцаў у будучыні больш уважліва прыслухоўвацца да партнёраў з Усходняй Еўропы?», – гіранізуе нямецкае выданне.
***
Урад Нідэрландаў узгадніў пакет мер на 2023 год, закліканы кампенсаваць зніжэнне пакупніцкай здольнасці насельніцтва, выкліканай высокай інфляцыяй, перш за ўсё для грамадзян з нізкімі даходамі. Сярод іншага, плануецца павелічэнне мінімальнай заработнай платы і павышэнне падаткаабкладання для заможных катэгорый грамадзян. Мясцовая прэса вітае праект, але выказвае і пэўную заклапочанасць.
Нідэрландская газета Handelsblad паказвае на тое, што рашэнняў на бліжэйшыя месяцы прадстаўлена не было.
«Дзякуючы пагадненню аб пакупніцкай здольнасці нагрузку на хатнія гаспадаркі можна будзе значна знізіць да 2023 года. Гэта добра, але гэта не вызваляе кааліцыйныя партыі ад абавязку думаць пра тое, як дапамагчы сем’ям, якія маюць у гэтым патрэбу, ужо зараз – да канца бягучага года. Разглядаць неабходна і неартадаксальныя меры. Напрыклад, як энергетычныя кампаніі маглі б дапамагчы зрабіць так, каб рахункі за энергію заставаліся ў межах разумнага? Магчыма, сваё ўнёсак могуць зрабіць і падатковыя органы, як бы складана гэта ні было. Улады павінны праявіць кемлівасць і вынаходлівасць. Пацярпелыя сем’і маюць права на гэта разлічваць!», – падкрэслівае нідэрландскае выданне.
***
Пасля смерці Міхаіла Гарбачова ў прэсе разгарнулася шырокая дыскусія пра тое, як ацэньваць яго гістарычную спадчыну. Расейскія дзяржаўныя СМІ ўскладаюць на Гарбачова віну за заняпад і распад Савецкага Саюзу. Іншыя СМІ шкадуюць аб тым, што шанцы і магчымасці, якія адкрыліся ў выніку яго дзейнасці, уганараванай Нобелеўскай прэміяй міру, былі прапушчаны.
«Паколькі традыцыйных дзяржаўных пахаванняў для Гарбачова арганізавана не было, то і заходнім палітыкам не давялося прымаць рашэнні, ехаць на іх ці не», – піша ірландская газета Irish Examiner.
«Патэнцыял у плане сімвалізму тут быў бы куды большы, і не толькі ў тым, што тычыцца рассадкі высокіх гасцей. Заходнія лідары маглі б проста адмовіцца наведваць спектакль, арганізаваны Пуціным. Калі б яны ўсё ж прыехалі, то тым самым пайшлі б на рызыку, што іх палічаць прыхільнікамі пуцінскага рэжыму. Калі б яны адхілілі фармальнае запрашэнне , што б яны і зрабілі, то тады ім можна было б паставіць абразу памяці Гарбачова, а заадно і абразу ўсёй Расеі. Такім чынам, адной праблемай менш: у цяперашні і без таго складаны час», – адзначае ірландскае выданне.
Агляд сусветнай прэсы падрыхтавала Вольга Сямашка.
Array