Агляд прэсы: без альтэрнатывы?
Беларусы асцерагаюцца быць уцягнутымі ва ўкраінскую вайну. Свет у чаканні контрнаступу Украіны. Джо Байдэн плануе вылучыцца на другі тэрмін. Дыскусія аб акцыях кліматычных актывістаў. Падрабязнасці свежых матэрыялаў замежнай прэсы.
«Лукашэнка вітаў тысячы расейскіх вайскоўцаў у сваёй краіне, дазволіўшы Крамлю выкарыстаць іх для пачатку ўварвання ва Украіну ў лютым 2022 года і прапанаваў размясціць там частку расейскай тактычнай ядзернай зброі. Але ён ухіліўся ад непасрэднага ўдзелу Беларусі ў баях — пакуль. Аналітыкі і палітычныя апаненты кажуць, што далейшае ўцягванне беларусаў ва Украіну можа зноў распаліць грамадскі гнеў супраць яго і падарваць яго жалезную хватку ва ўладзе, якая доўжылася амаль 29 гадоў», – піша амерыканская газета Los Angeles Times.
«Уварванне Расеі ва Украіну вельмі непапулярнае ў Беларусі, якая мае агульную мяжу з Украінай працягласцю 620 міль і мае шмат грамадзян, звязаных сям’ёй або асабістымі сувязямі. У выпадку ўводу ва Украіну 45-тысячнага войска краіны могуць адбыцца «масавыя адмовы ад выканання загадаў». Лукашэнка не пойдзе на гэта, «бо баіцца выклікаць незадаволенасць вайскоўцаў, якія могуць павярнуць зброю ў іншы бок». Пагаджаючыся размясціць у сваёй краіне частку расейскай тактычнай ядзернай зброі, Лукашэнка разглядаў гэты крок як абарону ад таго, што ён назваў агрэсіўнымі планамі НАТА і змовамі Захаду супраць яго ўрада. Будаўніцтва сховішчаў тактычнай ядзернай зброі ў Беларусі завершыцца да 1 ліпеня. Расія ўжо змадыфікавала беларускія баявыя самалёты для перавозкі ядзернай зброі і дала свайму саюзніку ракеты малой далёкасці «Іскандэр», якія могуць быць абсталяваны ядзернай боегалоўкай. Таксама навучаны беларускія экіпажы кіраванню самалётамі і ракетамі, узброенымі ядзернай зброяй. Але ж размяшчэнне расейскай ядзернай зброі зробіць Беларусь мішэнню ў выпадку эскалацыі», — піша амерыканскае выданне.
Размовы аб контрнаступленні ВСУ, які мае адбыцца, становяцца ўсё больш канкрэтнымі. Згодна з паведамленнямі, падраздзяленні ўкраінскай арміі здолелі заняць пазіцыі на вузкай паласе левага берага Дняпра на поўдзень ад Херсона. У Бахмуце, аднак, па-ранейшаму працягваюцца цяжкія баі. Аглядальнікі разважаюць аб тым, як будзе развівацца сітуацыя на полі бою. «Фарсаванне Дняпра дае надзею на далейшыя поспехі ўкраінскага войска», – піша румынскі партал Spotmedia.
«Яно дэманструе тое, што ВСУ ў стане адціснуць расейскія войскі, нават калі тыя абаронены натуральнай і цяжкапераадольнай перашкодай. Расейскія генералы ўсвядомілі, што паўвостраў Крым уразлівы, і зараз там выкапаны акопы і ўсталяваны супрацьтанкавыя бетонныя загароды. Цяжка кантраляваць такую вялікую тэрыторыю, калі ўмацоўваюцца толькі тыя раёны, што лічацца ўразлівымі. Мяркуючы па ўсім, Расеі з яе статычнай арміяй, якой не хапае як баявога духу, так і сучасных узбраенняў, будзе вельмі няпроста паспрабаваць перакрэсліць складаны, заснаваны на тактычных кроках план контрнаступлення ВСУ», – канстатуе румынскае выданне.
Праз чатыры гады пасля вылучэння сваёй кандыдатуры на прэзідэнцкую пасаду Джо Байдэн апублікаваў відэа, у якім абвясціў пра свой намер вылучыцца і на другі тэрмін. Прэзідэнцкія выбары адбудуцца ў 2024 годзе. Як напісаў Байдэн у сваім акаўнце ў Twitter, зараз трэба абараніць дэмакратыю. «Давайце давядзём працу да канца», – такім заклікам ён скончыў свой зварот. Прэса ўзважвае аргументы за і супраць вылучэння Байдэна на прэзідэнцкую пасаду. «Нават калі кандыдатура Байдэна не знойдзе ўсеагульнай ухвалы сярод саміх дэмакратаў, яго перавыбранне цалкам можа адбыцца», – піша шведская газета Dagens Nyheter.
«Рэспубліканцаў і далей будзе пераследваць праблема абортаў, прычым незалежна ад таго, хто будзе вылучаны ў кандыдаты ў наступным годзе: Дональд Трамп, Рон Дэсантыс ці хто-небудзь яшчэ. Гэта дае Байдэну шанец. І хаця энтузіязму наконт перспектывы яго новага прэзідэнцкага тэрміну не назіраецца нават у шэрагах яго ўласнай партыі, імкненне згуртавацца і даць адпор кандыдату ад рэспубліканцаў надзвычай вялікае. А таму, у сваю чаргу, на праймерыз давядзецца змагацца за добразычлівасць усё больш радыкальна настроеных выбаршчыкаў, каб хаця б мець шанц на вылучэнне. Гэты факт можа мець вялікае значэнне, асабліва на фоне таго, што зыход выбараў будзе вызначацца галасаваннем у шасці ці сямі штатах», – падкрэслівае шведскае выданне.
У Нямеччыне кліматычныя актывісты з руху „Апошняе пакаленне” масава блакуюць вуліцы ў Берліне і яго наваколлях. Па дадзеных паліцыі, толькі ў панядзелак адбылося больш за 40 акцый, у рамках якіх актывісты прыклейвалі сябе да асфальту. Падобныя акцыі пратэсту ўжо некалькі месяцаў адбываюцца ў шэрагу еўрапейскіх краін. Стварэннем транспартных пробак актывісты спрабуюць прыцягнуць увагу да надзённасці кліматычнай праблемы. «Блакуючы дарожны рух, актывісты толькі шкодзяць справе абароны клімату», – з такой крытыкай выступае аўстрыйская газета Der Standard.
«Гэтак сумнеўныя метады ўсё больш дыскрэдытуюць тую важную тэму, на якую яны спрабуюць звярнуць увагу. У шматлікіх цяпер абарона клімату асацыюецца выключна з «парушальнікамі спакою», якія ўскладняюць і без таго няпростае паўсядзённае жыццё. Калі гэтыя аматары прыляпляць сябе паўсюдна «дзеля клімату» і на самай справе жадаюць задаць добрае ўзварушэнне палітыкам і ўладам, то тады ім варта было б змяніць стратэгію. Прыляпіцца можна і перад ведамствам канцлера. А яшчэ лепш – перад штаб-кватэрай СвДП! Аднак тое, як гэта барацьба праводзіцца тут і зараз – контрпрадуктыўна. Гэта толькі адштурхвае людзей, і ніякім чынам не спрыяе справе абароны клімату», – адзначае аўстрыйскае выданне.
Агляд сусветнай прэсы падрыхтавала Вольга Сямашка
