Агляд прэсы: перакроіць свет
Лукашэнка заяўляе пра перадачу Беларусі ядзернай зброі. ЕЗ дасць Украіне мільён снарадаў для артылерыі. Мірны план Кітая так і не выклікаў даверу. Што рабіць з недахопам водных рэсурсаў? Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Лукашэнка прыстрашыў, што Расея можа перадаць Беларусі ядзерную зброю. У такі спосаб дыктатар адрэагаваў на планы Брытаніі перадаць Украіне боепрыпасы са збедненым уранам», – піша ўкраінскае выданне Ukrainian Military Center.
«Беларускі дыктатар таксама заявіў, што ў выпадку выкарыстання гэтых боепрыпасаў адказ Расеі будзе «жахлівым». Відавочна цяпер Аляксандар Лукашэнка і расейскія ўлады выкарыстоўваюць у прапагандысцкіх мэтах навіны пра пастаўкі Ўкраіне боепрыпасаў са збедненым уранам. Тэрмін «збеднены ўран» азначае пабочны прадукт радыеактыўнага ізатопа ўрану U-235, які выкідваецца ў ядзерную энергетыку і зброю. Пасля вылучэння актыўнага ізатопа гэты метал становіцца менш радыеактыўным, чым прыродны ўран і яго руда, і мае на 40% меншую радыяцыю. Выкарыстанне гэтага металу ў боепрыпасах звязана з яго ўласцівасцямі: высокай масай, шчыльнасцю і пірафорнасцю. Дзякуючы гэтым характарыстыкам, снарады валодаюць высокім бранябойным эфектам і наносяць значныя паразы брані. У Вялікабрытаніі снарады L26, L27 і L29 аснашчаны менавіта бранябойным стрыжнем са збедненага ўрану», – падкрэслівае ўкраінскае выданне.
Краіны ЭЗ маюць намер на працягу года паставіць Украіне 1 000 000 артылерыйскіх снарадаў. Міністры замежных спраў краін супольнасці дамовіліся пра тое, што на гэта будуць выдаткаваны два мільярды эўра. Сродкі пойдуць не толькі на выплату кампенсацый краінам, якія пастаўляюць снарады з уласных запасаў, але і на сумесную іх закупку, у тым ліку ў рамках агульных заказаў, якія прадугледжваюць прадастаўленне скідак. «На каленцы, якія выкідваюцца Будапештам, ужо ніхто не звяртае ўвагі», – піша венгерская газета Népszava.
«Наша краіна заявіла пра тое, што не мае намеру ўдзельнічаць у пастаўках боепрыпасаў Украіне, якія на днях былі ўзгодненыя краінамі ЕЗ. Так, Вугоршчына не наклала вета , але ў яе і не было такой магчымасці, паколькі ўсе астатнія краіны проста адмахнуліся ад яе меркавання. Вугоршчына стала таксама адзінай краінай Еўрасаюза, якая не прагаласавала за стварэнне камісіі НАТА-Украіна, але тым не менш, камісія была створана. Цярпенне нашых саюзнікаў па ЕС знаходзіцца на мяжы. Брусель ужо не цікавяць матывы дзеянняў Орбана. Брусель вырашыў яго проста ігнараваць», – канстатуе венгерскае выданне.
У сераду завяршыўся трохдзённы візіт лідэра Кітая Сі Цзіньпіна ў Маскву. Пуцін і Сі абмеркавалі распрацаваны Пекінам план мірнага ўрэгулявання з дванаццаці пунктаў. Расейскі прэзідэнт станоўча адазваўся аб ініцыятыве, адзначыўшы, што яна можа паслужыць асновай для мірнага рашэння. «Мірны план Кітая зараз і ламанага гроша не каштуе», – да такой высновы прыходзіць гішпанская газета El Mundo.
«Падтрымка, якая аказваецца Сі Пуціну, цалкам перакрэслівае так званы мірны план Кітая, у якім той, спрабуючы захоўваць зусім недарэчную «роўнааддаленасць» і «аб’ектыўнасць», выступае за тэрытарыяльную цэласнасць Украіны, але ні слова не кажа аб агрэсіі Масквы! Лідэр Кітая не выйшаў на сувязь з прэзідэнтам Украіны, а яго бойкі гандаль з абкладзенай санкцыямі Расеяй яму толькі на руку. Візіт Сі ўзмацніў небяспечны палітычны і эканамічны альянс двух аўтакратаў, аб’яднаных імкненнем перакроіць сусветны парадак. Гэтае партнёрства прымушае заходніх саюзнікаў умацоўваць сваю абарону і нарошчваць узбраенні. Пра гэта сведчыць і візіт у Кіеў прэм’ер-міністра Японіі Фуміё Кісіды», – адзначае гішпанскае выданне.
Праблема недахопу вады будзе пагаршацца ва ўсім свеце, распаўсюджваючыся і на тыя рэгіёны, дзе праблем з вадой на сённяшні дзень пакуль што не існуе. Да такой высновы прыйшлі аўтары даклада, апублікаванага напярэдадні Канферэнцыі ААН па водных рэсурсах, якая адкрылася ў мінулую сераду. Гэта першая канферэнцыя ААН па гэтай тэматыцы з 1977 года. «Прыватызацыя водазабеспячэння ні да чаго добрага не прыводзіць», – піша грэчаскі партал TVXS.
«Асноўны закон рынку – рэнтабельнасць. У выпадку з вадой гэта не працуе – з прычыны яе недахопу. Гэта галоўная прычына таго, што прыватызацыя ў галіне водазабеспячэння правалілася паўсюль, дзе б яна ні праводзілася. Штучнае падвышэнне цэнаў на ваду ў спалучэнні з пагаршэннем утрымання і эксплуатацыі сетак паўсюдна прывяло да таго, што водазабеспячэнне прыйшлося вярнуць у сферу дзяржаўнага кіравання. Там яно і павінна заставацца: таму што захаванне жыцця, неад’емным элементам якой з’яўляецца вада, з’яўляецца першачарговай задачай любой палітычнай і ідэалагічнай сістэмы», – падкрэслівае грэчаскае выданне.
Агляд сусветнай прэсы падрыхтавала Вольга Сямашка.
Беларускае Радыё Рацыя
