Сілавікі масава затрымліваюць веласіпедыстаў у Менску. Гэта адбылося пасля таго, як яны арганізавалі групавыя паездкі па горадзе — такая акцыя за свабодныя выбары і супраць Аляксандра Лукашэнкі.
* * *
Сёння ў 19.00 на на менскіх праспектах аўтамабілісты пачалі флэшмоб.
Роўна а 19.00 кіроўцы пачалі апускаць шкло машын, уключаць гучна песню «Пераменаў» і падымаць рукі з белымі бранзалетамі.
Такім чынам яны выказваюць салідарнасць з гукарэжысёрамі Уладзіславам Сакалоўскім і Кірылам Галанавым, якія а 19.00 на дзяржаўным свяце ўключылі песню «Пераменаў» і паднялі рукі з белымі бранзалетамі. Нагадаем, сёння іх асудзілі на 10 сутак кожнага.
У некаторыя машыны сабралася па чацвёра-пяцёра чалавек, і ўсе рукі ўздымаюць.
Плошчу Перамогі вырашылі перакрыць.
На пераходзе ля «Вячэрняга Мінска» збіраюцца людзі і вітаюць паднятымі рукамі аўтамабілістаў.
Тыя, каго не пускаюць на праспект да Вечнага агню, едуць сігналіць па Казлова.
Паралельна з аўтамабілістамі, на прабег уздоўж праспекта выехалі веласіпедысты, іх некалькі дзясяткаў.
Уздоўж праспекта ходзіць пара з каляскай, у якой партатыўная калонка схавана. З калонкі гучыць «Перамен».
Каля Плошчы Перамогі высадзіліся ўнутраныя войскі.
Ехала калона ў бок Перамогі, там запаркаваўся аўтазак, выйшлі ўнутраныя войскі, раварысты павярнулі назад і паехалі ў бок Машэрава.
