Украіна перадала Расеі ўсіх цяжкапараненых, якіх можна было транспартаваць
Украіна ў аднабаковым парадку перадала Расеі ўсіх цяжкапараненых і цяжкахворых палонных, якіх можна было транспартаваць. Пра гэта паведамляе hromadske.ua са спасылкай на Каардынацыйны штаб па пытаннях абыходжання з ваеннапалоннымі. Перадача адбылася пры ўдзеле Міжнароднага камітэта Чырвонага Крыжа.
Гаворка ідзе пра расейскіх жаўнераў, якія трапілі ў палон з пачатку поўнамаштабнага ўварвання Расеі ва Украіну.
Гэта не абмен ваеннапалоннымі, а рэпатрыяцыя — вяртанне цяжкапараненых палонных без усялях умоў, як гэта прадугледжана міжнародным гуманітарным правам.
Разам з тым, як адзначаюць ва Украіне, Расея працягвае ўтрымліваць тысячы ўкраінскіх грамадзян, у тым ліку цяжкахворых і параненых, дзяцей, жанчын і пажылых людзей. Усіх іх мусілі б вярнуць ва Украіну без усялякіх умоваў, як таго патрабуе міжнароднае гуманітарнае права.
Беларускае Радыё Рацыя
