У Беластоку можа з’явіцца казіно
У Беластоку можа з’явіцца казіно, на што ўжо згадзіліся гарадскія радныя.
Вядома нават адно з верагодных месцаў, дзе яно можа з’явіцца, гэта гатэль на вуліцы Ліповай.
Казіно ў Беластоку хочуць адкрыць чатыры розныя фірмы з Варшавы. Аднак на Падляшшы можа з’явіцца толькі адно казіно, тлумачыць Данута Гурнікевіч з гарадскога магістрата:
– У нашым ваяводстве можа быць толькі и выключна адно казіно, бо згодна з законам пра азартныя гульні на 650 тысяч жыхароў можа быць адно казіно. Падляшскае ваяводства налічвае менш за 1 мільён 200 тыяч жыхароў.
Радны ад Камітэта Трускаляскага Марцін Шчудла:
– Я ўстрымаюся. Лічу, што з аднаго боку казіно легальнае, але з іншага боку бачу пагрозу ў выглядзе азарту і асоб, якія робяцца ад гэтага залежнымі. У нас у клубе кожны прагаласуе паводле ўласнага меркавання.
Радны Збігнеў Брожак “Права і справядлівасць”:
– Я лічу, што калі будзе адно легальнае казіно, то з’явяцца і нелегальныя.
Радны Мацей Бернацкі з “Грамадзянскай платформы”:
– Кантраляваць вялікія пункты лягчэй. Зразумела, што ў легальным казіно не будуць ашукваць, а ў нелегальных іначай, пра што мы час ад часу даведваемся з медыяў.
Дазвол на адкрыццё казіно дае міністр фінансаў Польшчы. Фірма, якая хоча яго адкрыць, павінна будзе выканаць усе адпаведныя ўмовы.
Лукаш Леанюк, Беларускае Радыё Рацыя
