Свежы нумар “Дзеяслова” з Някляевым, Зуёнкам, Далідовічам…
Выйшаў з друку другі нумар (сакавік-красавік) літаратурна-мастацкага часопіса “Дзеяслоў”.
На першых старонках выдання апублікавана ўнікальная паэма Уладзіміра Някляева “Вар’ятня”. А таксама новыя вершы Валянціны Аксак, Васіля Зуёнка і Андрэя Сцепанюка. Новыя вершы Васіля Зуёнка – гэта развагі пра чалавечае жыццё і пра лёс Беларусі:
Зямны азіраю шар
З падступнай думай балеснаю:
Беларусь… ці ты Божы дар,
Ці ўпала сляза нябесня?..
Дэбютуе падборкай вершаў у “Дзеяслове” Дар’я Мацеша пад назвай “Меtamorphoses”.
Раздзел прозы распачынае Леанід Дранько-Майсюк “прозай з той кніжкі, якая можа быць” пад агульнай назвай “Скрыня. Куфар. Камода”. Дар’я Ліс чытачам прапануе біяграфічны расповед “Не кажы бабулі”, і са спадчыны Уладзіміра Міхно (1964-2019) друкуецца працяг аповесці “Квадратны цвік”.
Адам Глобус цікава піша пра тутэйшых арт-авангардыстаў, Барыс Пятровіч друкуе нататкі з нататнікаў “Ісці і не баяцца”, Лявон Валасюк знаёміць з “Выспачкамі памяці”, а Генрых Далідовіч падзяліўся сваімі штрыхамі да грамадзянскай біяграфіі творцы і дзяржаўнага дзеяча ў эпоху савецкай улады і пачатковага постсаветызму.
Сяргей Шапран прыгадвае “Рыгора Барадуліна з чорным катом і без”, а Васіль Аўраменка піша пра творчасць Андрэя Хадановіча.
Па-беларуску загучалі вершы ўкраінкі Ірыны Навіцкай і апавяданні літоўкі Марыі Ластаўскене.
На анкету “Дзеяслова” адказваюць Вольга Бабкова і Фелікс Баторын.
Беларускае Радыё Рацыя
